काठमाडौं । जिल्ला फुटबल संघ सुर्खेतका अध्यक्ष रविन्द्र चन्द ठकुरीलाई बर्खास्तीको माग सहित अविश्वासको प्रस्ताव दर्ता भएको छ ।
जिल्ला संघसँग आबद्ध १७ मध्य मताधिकार प्राप्त १४ क्लबले अध्यक्ष चन्दलाई पदबाट बर्खास्तको माग सहित अखिल नेपाल फुटबल संघ एन्फामा अविश्वासको प्रस्ताव दर्ता गराएका हुन् ।
विधान विपरित चन्दले मनोमानी ढंगले संस्था चलाएको र बिना कारण क्लबलाई कारबाही गर्ने जस्ता कार्य गरेको भन्दै १४ क्लबले बर्खास्तीको माग गरेका हुन् । जसमा बी डिभिजनबाट ए डिभिजन प्रवेश गरेका थप २ क्लब समेत सामेल छन् ।
जिल्लाका १६ क्लबको तर्फबाट फ्रेन्डसिप स्पोर्ट्स क्लबका सचिव सरद भण्डारीले एन्फामा पत्र लेख्दै अध्यक्ष चन्दलाई बर्खास्त गरी तदर्थ समिति गठन गरेर नयाँ निर्वाचन गराउन माग गरेका छन् । एन्फा विधान अनुसार साधारण सभा बोलाउन माग गरिएको छ ।
जिल्लाका मताधिकार क्लबहरु ब्वाइज युनियन, फ्रेन्डसिप स्पोर्ट्स, बाबियाचौर स्पोर्ट्स, बुद्धपथ स्पोर्ट्स, कालिमाटी समाज सुधार युथ क्लब, न्यू जेनेरेसन युथ क्लब, सिरमोर युथा था खेलकुद क्लब, एविसी स्पोर्ट्स क्लब, भैरवि युवा क्बब, जीवन ज्योती युवा क्लब, विरेन्द्रनगर स्पोर्ट्स क्लब, एसओएस न्यू स्टार स्पोर्ट्स क्लब, शिव बिहार पुस्तकालय क्लब, जी अल क्लब तथा ए डिभिजनमा बढुवा भएका मेलकुना फुटबल क्लब र रोयल फुटबल क्लबले अध्यक्ष बर्खास्तीको प्रस्तावमा हस्ताक्षर गरेका छन् ।
एन्फा विधान अनुसार ४० प्रतिशत सदस्यको हस्ताक्षर सहित विशेष साधारण सभा बोलाउन मिल्ने व्यवस्था अनुसार अविश्वासको प्रस्ताव उपर छलफल गर्न बैठक माग गरिएको फ्रेन्डसिप सचिव भण्डारीले बताए ।
बर्खास्तीको दबाब खेपिरहेका जिल्ला फुटबल संघ सर्खुेतका अध्यक्ष रविन्द्र चन्द ठकुरी राष्ट्रिय फुटबल टिमका सदस्य रोहित चन्दका सहोदर दाजु हुन् । एन्फाको पछिल्लो निर्वाचनमा पैसा खर्च गरेर जिल्ला नेतृत्व हत्याएको आरोप उनीमाथि लाग्ने गरेको छ ।
नेतृत्वविरुद्ध जिल्ला संघका अधिकांश क्लब विरोधमा उत्रिएपछि अखिल नेपाल फुटबल संघ एन्फाले विधान बमोजिम साधारण सभाको प्रकृया अघि बढाउन निर्देशन दिएको छ । महासचिव किरण राईले जिल्ला फुटबल संघलाई पत्र लेख्दै विशेष साधारण सभाको आयोजना गर्ने कार्यसमितिको निर्णयको प्रतिनिधि एन्फामा पठाउन निर्देशन दिएका छन् । जिल्लाभरका क्लबहरुको असन्तुष्टि र एन्फाको निर्देशनसँग आत्तिएका अध्यक्ष चन्द जिल्ला क्लबहरुलाई पुन प्रलोभनमा पारेर पद जोगाउन हार गुहार गरिरहेको एक क्लबका पदाधिकारीले बताए ।
-1736001334.jpeg)
