काठमाडौं । नेपाल अटोमोबाइल्स एसोसिएसन (नासा नेपाल) को आयोजनामा माउन्ट एभरेष्ट मोटर स्पोर्ट्स फेस्टिभल आयोजना हुने भएको छ ।
नयाँ वर्षको पहिलो मोटर स्पोर्ट्सको इभेन्टको रुपमा आगामी शनिबार मोटर स्पोर्ट्स फेस्टिभल आयोजना हुने भएको हो ।
नासा नेपालको आयोजना तथा बागमती प्रदेश खेलकुद विकास परिषदको सहयोगमा धुलिखेलस्थित हिमालयन मोटरल्यान्डमा आयोजना हुने फेस्टिभलमा अटोक्रस प्रतियोगिता, अटो जिमखाना, कार्टिङ कप, क्वाड बाइक च्यालेन्ज र स्टन्ट शो गरी ५ विधामा प्रतियोगिता हुनेछ ।
नेपालमै पहिलो पटक हुने क्वाड बाइक च्यालेन्जमा क्वाड बाइकको प्रतियोगिता सम्बन्धी नियम र गाइडलाइन समेत सार्वजनिक गरिने छ । स्टन्ट शो अन्तर्गत संघले घोषणा गरेको कार्ययोजना स्टन्ट ब्याटलको घोषणा गरिने र कार्यविधि सार्वजनिक गरिने नासा नेपालले जनाएको छ । त्यसैगरी अटोक्रस नेपालमै मोडिफाई गरिएको क्रसकारको सम्पुर्ण रेसिङ हो, जसमा नासा नेपालका नेसनल लाइसेन्स प्राप्त डाइभरहरुले पहिलो पटक भाग लिने छन् ।
अटो जिमखानाका दुई जना विजेतालाई अन्तर्राष्टिय सहभागिताको अवसर प्रदान गरिने छ । अटो जिमखाना, क्रसकार र काट्र्स गरी तीन खेलका विजेताहरुले क्रमशः २७ हजार, ९ हजार र ३ हजार नगद पुरस्कार र प्रमाणपत्र प्राप्त गर्नेछन् । बाँकी दुई इभेन्टका विजेताले अवार्ड र प्रमाणपत्र पाउने छन् ।
झन्डै १० वर्ष अगाडि देखि शुरु भएको हिमालयन मोटरल्यान्डमा कार्यक्रम हुनेछ ।
अटो जिमखाना र क्रसकारका सहभागीहरु नेसनल डाइभिङ लाइसेन्स प्राप्त, अटोक्रस तालिम प्राप्त, राष्ट्रिय अन्तर्राष्ट्रिय इभेन्टका सहभागी तथा विजेताहरुनै संलग्न हुनेछन् । सहभागीहरुले ५ मध्य कुनै २ इभेन्टमा प्रतिस्पर्धा गर्न सक्ने छन्, जसको दर्ता शुल्क तीन हजार रुपैयाँ हुनेछ भने प्रति इभेन्टको दुई हजार मात्र हुनेछ ।
अटोक्रसमा १० जना तथा अटो जिमखानामा बढीमा २० जनाले मात्र सहभागिताको अवसर प्राप्त गर्नेछन् ।
अटो जिमखानामा मुलतः युवा विद्यार्थीहरुलाई लक्षित गरेर सञ्चालन गर्न लागिएको हो । कार्टिङको तालिम लिएका, कुनै एक इभेन्टमा सहभागी भएका र नासा नेपालको लाइसेन्स होल्डर युवाहरुले सहभागिताको अवसर पाउने छन् । काठमाडौं विश्वविद्यालय, काठमाडौं इन्जिनियरिङ कलेज, थापाथली इन्जिनियरिङ कलेज र पुल्चोक इन्जिनियरिङ कलेज लगायतका कलेजहरुले कार्यक्रममा सहभागिता जनाउने छन् । यसमा बढीमा २० जना प्रतियोगी सहभागी हुन सक्नेछन् ।
माउन्ट एभरेष्ट मोटर स्पोर्ट्स फेस्टिभल र नासा नेपालको रजिष्टेसन गर्नका लागि सोही कार्यक्रमको सन्दर्भ पारेर शक्रबार एड्भान्स मार्सल तथा इभेन्ट म्यानेजमेन्ट वर्कशप धुलिखेलमा आयोजना गरिने छ । सो वर्कशपमा क्यालेन्डर अनुसारको इभेन्टको डिजाइन, कम्युनिकेसन र इभेन्ट संचालन विधि तथा प्रयोगात्मक कार्यहरु सिकाइने छ ।
त्यसैगरी सोही दिनमा नै हालसालै अन्तर्राष्ट्रिय मोटरसाक्लिङ फेडरेसन (एफआईम)द्वारा प्राप्त विमेन इन मोटरसाइक्लिङ अवार्डको सेलिब्रेसन कार्यक्रम समेत आयोजना गरिने छ । सो अवसरमा युथ र इमर्जिङ लिडरसिपका लागि मेन्टरिङ कार्यक्रमको समेत घोषणा गरिने छ । एफआईएको सहयोगमा नेपालमा संचालन भइरहेको मोटर स्पोर्ट्स सम्बन्धी सहयोग कार्यक्रम अन्तर्गत प्राप्त विभिन्न इक्विपमेन्ट तथा औजार उपकरणहरुको समेत फेस्टिभल सन्दर्भमा प्रयोग शुभारम्भ गरिने छ ।
एफआईए, एफआईएम, प्रदेश खेलकुद परिषद बागमती तथा विभिन्न कर्पोरेट क्षेत्रको समेत साथ रहने फेस्टिभलमा ६० जना ड्राइभर तथा ४० जना प्राविधिकहरुको सहभागिता रहने छ । यस सम्बन्धी रजिष्ट्रेसन गर्नका लागि माउन्ट एभरेष्ट मोटर स्पोर्ट फेस्टिभल तथा नासा नेपालका सोसल मिडिया र अन्य प्लेटफर्म प्रयोग गर्न सकिन्छ ।
-1735651318.jpg)
