काठमाडौं । नेपाल फेन्सिङ संघका अध्यक्ष सुनिल कुमार श्रेष्ठले नेपाल ओलम्पिक कमिटि एनओसीको चुनाव बहिष्कार गरेका छन् । अदालतको आदेश र सरकारको निर्देशनको सम्मान गर्दै उनले आफुले चुनावी प्रकृयामा सामेल हुन नसक्ने बताएका हुन् ।
अदालती आदेश विपरित विधान संशोधन गरेर गर्न खोजिएको चुनाव रोक्न गृह प्रशासन सोमबार प्रहरी हस्तक्षप गरेको थियो । प्रहरीको हस्तक्षपपछि उम्मेदवारको मनोनयन दर्ता प्रकृयालाई अनलाईनबाट आह्वान गरिएको छ ।
नेपाल ओलम्पिकभित्र वर्तमान अध्यक्ष जीवनराम श्रेष्ठविरुद्ध लड्दै आएका सुनिलले आसन्न चुनावमा नेतृत्वमा उम्मेदवारी दिने तयारी गरेका थिए । एकलौटी रुपमा वर्तमान अध्यक्ष जीवनराम श्रेष्ठले प्रकृया अघि बढाएपछि निर्वाचन बहिष्कार गर्ने निर्णयमा आफु पुगेको श्रेष्ठले बताए । जबर्जस्ती विधान संशोधन गर्ने निर्णयको सुनिलले प्रतिवाद गर्दै आएका थिए ।
‘अदालत आदेश र सरकारको निर्देशन भन्दा बाहिर गएर गर्न खोजिएको निर्वाचनमा सहभागी हुन सक्दिन ।’ श्रेष्ठले भने, ‘देशको कानुन र प्रशासनलाई सबैले मान्नुपर्छ । अनलाईनबाट माग गरिएको उम्मेदवारी दर्तामा सहभागी हुन नसक्ने जानकारी ओलम्पिकलाई गराएको छु ।’
उनले अदालती मुद्धाको निरुपण भएपछि मात्र आफु निर्वाचन प्रकृयामा सामेल हुने बताएका छन् ।
अदालतको आदेश र सरकारको निर्देशन विपरित नेपाल ओलम्पिक कमिटिले पुस १३ गते निर्वाचनको मिति तोकेको छ । उच्च अदालत पाटनले चुनाव रोक्ने रिटमाथि सोमबार सुनुवाई गर्दै अन्तरिम आदेशको सन्दर्भमा छलफल गर्न दुवै पक्षलाई बोलाएको छ ।
