काठमाडौं । गृह प्रशासनले नेपाल ओलम्पिक कमिटि एनओसीको चुनाव रोकेको छ ।
अदालतको आदेश अवज्ञा गर्दै एनओसीले निर्वाचन प्रकृया अघि बढाएपछि गृह प्रशासनले ओलम्पिक चुनाव रोकेको छ ।
चुनावी तालिका अनुसार सोमबार उम्मेदवारी मनोनयन गर्ने तालिका रहेको थियो । सोमबार बिहानीबाटै एनओसी परिसरमा प्रशासनले प्रहरी परिचालन गरेको छ ।
प्रहरीले ओलम्पिकको गेट बन्द गरेर कसैलाई प्रवेश गर्न दिएको छैन । प्रशासनले ओलम्पिक परिसरमा हस्तक्षप गरेपछि निर्वाचन रोकिने अवस्थामा पुगेको छ ।
एनओसी महासचिव निलेन्द्रराज श्रेष्ठले अदालतको आदेश अनुसार प्रशासनले चुनाव रोकेको खेलपाटीलाई बताए । उनले प्रशासनको हस्तक्षपपछि चुनावी प्रकृया अघि बढ्ने अवस्था नरहेको बताए ।
‘यो अदालतको विषय हो । अन्तराष्ट्रिय ओलम्पिक कमिटि सम्मानित अदालतको विषयमा प्रवेश गर्दैन ।’ उनले खेलपाटीसँग भने ।
विधान संशोधन रोक्न अदालतले दिएको आदेश विपरित ओलम्पिक कमिटिले विधान संशोधन गर्दै निर्वाचन प्रकृया अघि बढाएको थियो । अदालतको आदेश अवज्ञा गर्दै निर्वाचन प्रकृया अघि बढेपछि चुनाव रोक्न राष्ट्रिय खेलकुद परिषद्ले निर्देशन दिएको थियो ।
अदालत र खेलकुदको कार्यकारी निकायलाई बेवास्ता गर्दै ओलम्पिक चुनावी प्रकृयामा अघि बढेपछि अदालतको आदेश कार्यान्वयन गर्न भन्दै प्रशासनले ओलम्पिक कमिटिमा हस्तक्षप गरेको हो ।
‘अदालतको आदेश अनुसार प्रशासनले हस्तक्षप गरेको हो । यसलाई सरकारको हस्तक्षप भन्दा अदालतको आदेशको कार्यान्वयनको रुपमा बुझ्नुपर्छ ।’ नेपाल क्लाईम्बिङ संघका अध्यक्ष रमेश पौडेलले भने, ‘सरकार प्रजातान्त्रिक रुपमा सबै संस्था सञ्चालन होस भन्ने चाहन्छ । देशको कानुन सबैले मान्नुपर्छ ।’
