दुई कार्यकारी सहित ९ बोर्ड सदस्य रिक्त 

काठमाडौं । राष्ट्रिय खेलकुद परिषद्को ९ बोर्ड सदस्यको पद रिक्त भएको छ । 

मन्त्री परिषद्बाट नियुक्ति पाएका दुई कार्यकारी सहित राखेपका ९ बोर्ड सदस्यको चार वर्षको पदावधि मंगलबार सकिएको हो ।  

२०७७ साल असोज २३ गतेको मन्त्री परिषद्को बैठकले राष्ट्रिय खेलकुद विकास ऐन २०७७ अनुसार ९ बोर्ड सदस्य नियुक्त गरेको थियो । 

बोर्ड सदस्यहरु मानदेव हजारा, पुरेन्द्र बिक्रम लाखे, राजेश गुरुङ, मोहमद सागिर शेख, नन्दा बस्याल, यकेन्द्र कुँवर, चन्द्रबदना राई, एलबी क्षेत्री र सुमित्रा चौधरी रहेका छन् । हरी खड्काको स्थानमा मन्त्रीपरिषद्ले एलबी क्षेत्रीलाई बाँकी कार्यकालका लागि नियुक्त गरेको थियो । 

यकेन्द्र कुँवर र नन्दा बस्याल कार्यकारी सदस्यको भुमिकामा काम गर्दै आएका थिए । 

तत्कालिन प्रधानमन्त्री केपी शर्मा ओली नेतृत्वको मन्त्री परिषद्ले क्याबिनेटबाट नियुक्त हुने ९ जनामा एमाले पृष्ठभुमीका खेलकर्मीलाई नियुक्ती दिएको थियो । 

पछिल्लो समय खेलकुद मन्त्रालयको नेतृत्व गरिरहेका युवा तथा खेलकुद मन्त्री तेजुलाल चौधरीले राखेपका ६ जना बोर्ड सदस्यलाई पदबाट हटाउने निर्णय गरेका थिए । मन्त्रीको निर्णयविरुद्ध अदालत गएका तीन जना बोर्ड सदस्य अन्जन धमला, सम्राट कुसारी र जनक बर्तौलाले अन्तरिम आदेश लिएर अल्पकालिन रुपमा पदमा फर्किएका छन् ।

अदालतको अन्तरिम फैसलाले राखेप अध्यक्षको हैसियतमा खेलकुद मन्त्रीले नियुक्ति गर्ने तयारी गरेका बोर्ड सदस्यको सूचि अलपत्र परेको छ ।