रजतमा चीनलाई उछिन्दै अमेरिका पहिलो, आयोजक फ्रान्स पाँचौं स्थानमा खुम्चियो

काठमाडौं। खेलको महाकुम्भ भनिने ओलम्पिक फ्रान्सको राजधानी पेरिसमा सम्पन्न भएको छ। २६ जुलाईबाट औपचारिक रूपमा सुरु भएको पेरिस ओलम्पिक २०२४ भव्य समारोहका साथ सम्पन्न भएको हो।

अमेरिकाले शीर्ष स्थानमा रहेर पेरिस ओलम्पिक २०२४ अन्त्य गरेको छ। अन्तिम दिन आइतबार अमेरिकाले पुरुष बास्केटबलमा स्वर्ण जित्दै‌ चीनसँग स्वर्ण पदकको संख्या बराबरी गरेको थियो। स्वर्ण पदकमा चीनसँग‌ बराबरी भएपछि अमेरिकालाई रजतको आधारमा पहिलो बनाइएको हो।

अमेरिकाले ४० स्वर्ण जित्यो। यस्तै, ४४ रजत र ४२ कास्य गरी कुल १२६ पदक जित्यो चीनले पनि ४० स्वर्ण नै जित्यो। चीनले २७ रजत र २४ कास्य गरी ९१ पदकमात्रै हासिल गर्न सक्यो। यो अमेरिकाको भन्दा ३५ पदक कम हो। अन्तिम दिन अस्ट्रेलियालाई पछि पार्दै जापान तेस्रो भयो।

जापानले २० स्वर्ण, १२ रजत र १३ कास्यसहित ४५ पदक जित्यो। अस्ट्रेलियाले भने १८ स्वर्ण, १९ रजत र १६ कास्य पदकसहित कुल ५३ पदक हात पार्‍यो। आयोजक फ्रान्स पाँचौं स्थानमा रह्यो। फ्रान्सले १६ स्वर्ण, २६ रजत र २२ कास्यसहित कुल ६४ पदक जित्यो।

६२ राष्ट्रले स्वर्ण पदक जित्दा ८४ राष्ट्रले पदक जित्न सफल भए। नेपालबाट सुटिङकी सुस्मिता नेपाल, टेबल टेनिसका स्यान्टु श्रेष्ठ, पौडीका एलेक्जेन्डर शाह र डुवाना लामा, जुडोकी मनिता श्रेष्ठ, सन्तोषी श्रेष्ठ र ब्याडमिन्टनका प्रिन्स दाहालले चुनौती प्रस्तुत गरेका थिए। यद्यपि, यी खेलाडीको प्रदर्शन सुखद बन्न सकेन।