काठमाडौं। पाकिस्तानका अरशद नदीमले नयाँ कीर्तिमानका साथ पेरिस ओलम्पिक २०२४ अन्तर्गत ज्याभलिन थ्रोमा स्वर्ण पदक जितेका छन्। सन् १९९२ को बार्सिलोना ओलम्पिकपछि पाकिस्तानको यो पहिलो पदक हो।
नदीमले ९२.९७ मिटरको दोस्रो थ्रो गर्दै ओलम्पिकमा नयाँ कीर्तिमान बनाएका छन्। उनले छैटौं तथा अन्तिम थ्रो ९१.७९ मिटर गरेका थिए। यसअघि सन् २००८ को बेइजिङ ओलम्पिकमा नर्वेका एन्ड्रियास टिले ९०.५७ मिटर थ्रो गरेका थिए।
डिफेन्डिङ च्याम्पियन नीरज चोपडाले रजत पदक जिते। लगातार ओलम्पिकमा पदक जित्ने उनी पहिलो भारतीय ट्रयाक एन्ड फिल्ड खेलाडी बनेका छन्।
यसअघि कुस्ती खेलाडी सुशील कुमार (२००८ र २०१२) र ब्याडमिन्टन खेलाडी पीभी सिन्धु (२०१६ र २०२१) ले यो उपलब्धि हासिल गरिसकेका छन्।
२६ वर्षीय नीरजको दोस्रो थ्रो ८९.४५ मिटर थियो। उनको एक मात्र वैध थ्रो थियो, जुन उनको सिजनको सर्वश्रेष्ठ थ्रो थियो। यसबाहेक उनले गरेका पाँचवटै प्रयास फाउल साबित भएका थिए। उनले टोकियोमा ८७.५८ मिटर थ्रो गर्दै स्वर्ण पदक जितेका थिए।
सुरुका १० खेलमा नीरजले जहिले पनि नदीमलाई हराएका थिए। नादिमले हाङझोउ एसियाली खेलकुदमा नीरजसँग प्रतिस्पर्धा गर्ने तय भएको थियो। तर, अन्तिम समयमा चोटका कारण उनी पछि हटेका थिए। नीरजले सन् २०१८ को एसियन गेम्स र कमनवेल्थ गेम्समा उनलाई हराएका थिए।
नीरजको अन्तिम प्रयास असफल भएपछि नदीमले घुँडा टेकेर भुइँमा चुम्बन गरेका थिए। टोकियोमा पाँचौं स्थानमा रहेका पाकिस्तानी खेलाडीले गत वर्षको विश्व च्याम्पियनसिपमा रजत पदक जितेका थिए। ग्रेनाडाका एन्डरसन पिटर्स ८८.५४ मिटर थ्रो गर्दै तेस्रो भए।
