नेपाल र भारतसहित चार टोली सेमिफाइनलमा

काठमाडौं। काभा वुमन्स नेसन्स भलिबल लिगको सेमिफाइनलमा पुग्ने चारै टोलीको टुंगो लागेको छ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा आइतबार भएको पहिलो खेलमा श्रीलंकाले प्रतियोगिताकै कमजोर टोली माल्दिभ्सलाई ३-० को सोझो सेटमा पराजित गरेसँगै अन्तिम चारमा पुग्ने टोलीको टुंगो लागेको हो।

पाँच टोली सहभागी प्रतियोगितामा घरेलु टोली नेपालसहित भारत, इरान र श्रीलंकाले अन्तिम चारमा स्थान पक्का गरेका छन्। भारत दुई जित र एक हारसहित सात अंक जोड्दै शीर्ष स्थानमा छ। भारतले इरानलाई ३-१ र  माल्दिभ्सलाई ३-० को सोझो सेटमा पराजित गरेको थियो। यस्तै, नेपालसँग भने ३-२ को सेटमा पराजित भयो।

नेपालको दुई खेलबाट पाँच अंक रहेको छ। नेपालले पहिलो खेलमा श्रीलंकालाई ३-० को सोझो सेटमा पराजित गरेको थियो। दोस्रो खेलमा भारतलाई ३-२ को सेटमा पराजित गर्‍यो। इरानको पनि पाँच अंक रहेको छ। इरानल श्रीलंकालाई ३-२ र माल्दिभ्सलाई ३-० को सोझो सेटमा पराजित गरेको थियो। 

नेपालसँग ३-० र इरानसँग ३-२ सेटमा हार बेहोरेको श्रीलंकाको भने चार अंक रहेको छ। श्रीलंकाले अन्तिम खेल भारतसँग खेल्ने छ। माल्दिभ्सले भने एक खेल बाँकी रहँदै प्रतियोगिताबाट बाहिरिसकेको छ। माल्दिभ्सले भारत, इरान र श्रीलंकासँग समान ३-० को सेटमा पराजय बेहोरेको थियो। माल्दिभ्सले अन्तिम खेल घरेलु टोली नेपालसँग खेल्ने तय छ।

 लिगको शीर्ष स्थानमा रहने र चौथो हुने टोली तथा दोस्रो स्थानको र तेस्रो स्थानको टोलीबीच सेमिफाइनलमा प्रतिस्पर्धा हुने छ। अन्तिमको दुई खेलले सेमिफाइनलमा को को भिड्छन् भन्ने तय हुनेछ।