ललितपुर। नवौँ गणेशमान सिंह स्मृति राष्ट्रिय रेटिङ बुद्धिचाल प्रतियोगिताको उपाधि नेपाल च्याम्पियन फिडे मास्टर रुपेश जैशवालले जितेका छन्। उनले फाइनलमा क्यान्डिडेट मास्टर मिलन लामासँग क्लासिकलतर्फको पहिलो र दोस्रो खेल बराबरी खेलेका थिए।
क्लासिकलमा १/१ को बराबरीले नतिजा नआएपछि खेल ट्राई बेकरमा धकेलिए। द्रुतगतिको ५/५ मिनेटको खेलमा सेतो र कालो गोटी दुवै खेलका मिलनलाई २-० ले पाराजित गर्दै रुपेशले उपाधि जितेका हुन्। उनले २ लाख ५३ हजार रुपैयाँ बराबरको मोटरसाइकल हात पारे।
लामो समयपछि खेलमा फर्केका युवा खेलाडी मिलनले लिग चरणमा उत्कृष्ट प्रदर्शन गर्दै फाइनलसम्म स्थान बनाएका थिए। उपविजेता बनेका उनले ८० हजार रुपैयाँमा चित्त बुझाए।
अर्का फिडे मास्टर क्षितिज भण्डारी तेस्रो स्थानमा रहे । उनले ५० हजार रुपैयाँ हात पारे। क्षितिजले तेस्रो स्थानको लागि भएको खेलमा यू- १६ का राष्ट्रिय विजेता पुरुषोत्तम सिलवाललाई १.५ - ०.५ को सोझो सेटमा पन्छाए। चौथो स्थानमा रहेका पुरुषोत्तमले ३० हजार रुपैयाँमा चित्त बुझाए।
स्विस लिग अनुसार नवौँ चरणसम्म भएको खेलमा आयोजक क्लबका सजिन महर्जन प्रथम स्थान ओगटे। उनले २५ हजार रुपैयाँ पाए। दोस्रो हुन सफल सर्लाहीका कमल श्रेष्ठले १५ हजार र तेस्रो भएका निकेश कुशाथाले १० हजार पाए। शैलेन्द्रकुमार न्यौपाने चौथो र झापाका राजन सुवेदी पाँचौँ स्थानमा रहे।
छैटौँदेखि दशौँमा क्रमशः तनहुँका सविनचन्द्र घिमिरे, काठमाडौँका राजेन्द्र बज्राचार्य, बद्रीलाल नेपाली, सुदीप तामाङ र केशव श्रेष्ठ रहे। महिलातर्फको उपाधि पूर्वमहिला राष्ट्रिय च्याम्पियन सिन्दिरा जोशीले हात पारिन्। उनले १० हजार रुपैयाँ हात पारे। दोस्रो र तेस्रो स्थानमा मोरङकी शान्ति धिमाल र काठमाडौँ पूर्णिमा गुरुङ रहिन्।
-1734919437.jpg)
-1734918317.jpg)
