मछिन्द्र र एनआरटीले बोके ऋण अंक

काठमाडौं । पल्सर सहिद स्मारक ए डिभिजन लिगमा मछिन्द्र क्लब र न्युरोड टिम एनआरटीले ऋण अंक बोेकेका छन् । मंगलबार सम्पन्न लिगमा तालिकाको पुछारमा रहँदै दुवै टोलीले ऋण अंक बोकेका हुन् ।

अखिल नेपाल फुटबल संघ एन्फाले यस पटक लिगमा रेलिगेशनको व्यवस्था गरेको थिएन । तर लिगको अन्तिम दुईमा रहने टिमलाई ऋण अंकको व्यवस्था गरेको थियो ।

एन्फाका अनुसार तालिकाको पुछारको टिमले २ अंक र पुछारबाट दोस्रो हुने टिमले १ अंक ऋण बोक्ने छ । एन्फाले पुछारका तीन टिमलाई ऋण अंक बोकाउने निर्णय गरेपनि अन्तिम समयमा आएर दुई टिमको मात्र अंक घटाउने बताएको थियो ।

अब मछिन्द्र र एनआरटीले ऋण अंक सहित आगामी बर्ष हुने शीर्ष डिभिजन लिगको सुरुवात गर्नेछन् ।

मंगलबार सकिएको लिगमा पुछारको एनआरटीले १३ खेलबाट मात्र ७ अंक जोड्यो । उसले मात्र एक खेलमा जित निकाल्यो । एनआरटीले आठ खेलमा हार र चारमा बराबरीको नतिजा निकाल्यो ।

सोही नतिजा पुछारबाट दोस्रोमा रहेको अर्को क्लब मछिन्द्रले निकाल्यो । तर गोल अन्तरका आधारमा मछिन्द्र पुछारदेखि दोस्रोमा उक्लियो । उसले एकमा जित, ८ खेलमा हार र ४ खेलमा बराबरीको नतिजा निकालेको थियो ।