काठमाडौं । अखिल नेपाल फुटबल संघ एन्फाले पल्सर सहिद स्मारक 'ए' डिभिजन लिग फुटबलको अन्तिम चरणको खेल तालिका सार्वजनिक गरेको छ ।
एन्फाले बिहिबार सार्वजनिक गरेको तालिका अनुसार अन्तिम चरण अर्थात १३ औं चरणका लिग खेलहरु शनिबारबाट सुरु हुनेछ । लिगको १२ औं चरणको खेल सकिदा विजेता र उपविजेताको तय भईसकेको छ ।
लिगको उपाधि मनाङ मर्स्याङ्दीले जित्दा संकटा क्लबले दोस्रो स्थान हासिल गरिसकेको छ ।
अन्तिम चरणको खेल अन्तर्गत पहिलो दिन शनिबार दुई खेल हुनेछ । पहिलो खेलमा जावलाखेल युथ क्लब र च्यासल युथ क्लबबीच खेल हुनेछ । सोहि दिन सरस्वती युथ क्लब र नेपाल पुलिस क्लबबीच खेल हुनेछ । दुवै खेल हल्चोकस्थित एपीएफ मैदानमा हुनेछ ।
यस्तै आइतबार एनआरटी र ब्रिगेड ब्वाइजले प्रतिस्पर्धा गर्दा सोहि दिन फ्रेन्ड्स क्लब र मनाङ मर्स्याङ्दी क्लबबीच पनि खेल हुनेछ ।
सोमबार मछिन्द्र र त्रिभुवन आर्मी क्लबले प्रतिस्पर्धा गर्ने छन् । अर्को खेलमा संकटा र एपीएफ भिड्नेछन् ।
लिगको अन्तिम दिन हिमालयन शेर्पा र थ्री स्टारबीच खेल हुनेछ । उक्त खेलसंगै लिग सकिनेछ ।
तालिका हेर्नुहोस् -
