'ए' डिभिजन लिग : विजेतासहित शीर्ष ६ मा पर्ने टिमको पुरस्कार रकम कति ?

काठमाडौं । राजधानीमा जारी पल्सर सहिद स्मारक 'ए' डिभिजन लिग फुटबल अन्तिम चरणमा पुगेको छ ।

बुधबार १२ औं चरणको अन्तिम दुई खेल सकिएसंगै लिग समापन नजिक पुगेको हो । अब लिगमा एक चरणको खेल बाँकी रहेको छ । र, सबै क्लबले एक एक खेल खेल्नेछन् ।

लिगको १२ औं चरण सकिदा लिगको विजेता र उपविजेता तय भईसकेको छ । लिगको उपाधि सिग्नेचर मनाङ मर्स्याङ्दीले जितेको छ । सीएमजी संकटाले उपविजेतामा आफुलाई उभ्याउन सफल भएको छ ।

'ए' डिभिजनका १४ क्लबले प्रतिस्पर्धा गरेको लिगमा तेस्रो स्थानदेखी छैटौं स्थानमा रहने टोलीको टुंगो लिगको अन्तिम चरणको खेलपछि लाग्नेछ ।

अखिल नेपाल फुटबल संघ (एन्फा) ले वार्म अपको रुपमा लिएको यस लिगमा रेलिगेसन हुँदैन् । पछिल्लो चार बर्षबाट हुन नसकेको लिग एन्फाको नयाँ नेतृत्व आएसंगै आयोजना गरेको हो ।

रेलिगेसन नहुने भएपनि १४ क्लबहरु लिगको शीर्ष ६ मा अटाउने लक्ष्यसहित प्रतिस्पर्धा गरिरहेका छन् । किनकी लिगको शीर्ष ६ मा पर्ने टोलीलाई एन्फाले नगद पुरस्कारको व्यवस्था गरेको छ । यस्तै व्यक्तिगत विधामा उत्कृष्ट हुनेले पनि पुरस्कार पाउनेछन् ।

एन्फाले जारी लिगका लागि ५ करोड ८० लाखको बजेट छुट्टाएको थियो । यस पटकको लिगको विजेता मनाङले ट्रफीसहित ५० लाख पाउनेछन् । उपविजेता संकटाले ३५ लाख प्राप्त गर्नेछ । यस्तै तेस्रो हुने टिमले २५ लाख पाउनेछ ।

'ए' डिभिजन लिगको शीर्ष ६ टोलीले कति नगद पुरस्कार पाउछन् ? सूची हेर्नुस् :

विजेता : ५० लाख, एएफसी एसियन कपमा सहभागिता (मनाङ मर्स्याङ्दी )

उपविजेता : ३५ लाख (संकटा)

तेस्रो : २५ लाख

चौथो : १५ लाख

पाँचौ : ७ लाख

छैटौं : ५ लाख

फेयर प्ले टिम : १ लाख

खेल जिते बापत बोनस : ५० हजार

तयारी खर्च : २० लाख

उत्कृष्ट गोलकिपर :पल्सर मोटरसाइकल

उत्कृष्ट डिफेन्स : पल्सर मोटरसाइकल