काठमाडौं । पल्सर सहिद स्मारक ए डिभिजन लिग अन्तर्गत आज (बुधबार) दुई खेल हुदैछ । लिगको १२ औ चरणको अन्तिम दिन मनाङले हिमालयन शेर्पा र संकटाले थ्री स्टारसंग खेल्नेछ ।
ललितपुरको सातदोबाटोस्थित एन्फा कम्प्लेक्समा दिउँसो साँढे २ बजे संकटा र थ्री स्टार भिड्नेछन् । मैदान उत्रदै गर्दा दुवै टोलीको लक्ष्य लिगको उपविजेताका बन्नु रहेको छ । मनाङले दुई खेल अगावै लिग जितेर अन्य क्लबको उपाधि सम्भावनामा पुर्णविराम लगाईदिएको थियो ।
लिगमा दुई चरणको मात्र खेल बाँकी रहदाँ थ्री स्टार र संकटा जित निकाल्दै उपविजेता बन्दै प्रतियोगिताको अन्त्य गर्न चाहन्छन् । संकटा २५ अंक सहित दोस्रो स्थानमा छ । थ्री स्टार २३ अंक सहित तेस्रो स्थानमा छ । संकटालाई पराजित गर्दै लिगको दोस्रो स्थानमा उक्लिने मौका ललितपुरे क्लब थ्री स्टारलाई प्राप्त छ ।
अर्को खेलमा मनाङले हिमालयन शेर्पासंगै खेल्नेछ । लिगको एघारौ चरणको खेलसम्म शतप्रतिशत जित निकाल्दै उपाधि जितेको मनाङ सोही प्रर्दशनलाई अन्तिम खेलसम्म लैजान चाहन्छ । शतप्रतिशत जित सहित लिगको अन्त्य गर्ने लक्ष्य मनाङको रहेको छ ।
उसले ११ खेलबाट ३३ अंक जोड्दै उपाधि सहित शीर्ष स्थान कब्जा गरेर बसेको छ । शेर्पा क्लब ११ अंक सहित तालिकाको सातौ स्थानमा छ । हिमालयन शेर्पालाई समेत शीर्ष ६ भित्र पर्न मनाङविरुद्वको खेल महत्वपुर्ण छ ।