काठमाडौं । राष्ट्रिय खेलकुद परिषद् (राखेप)ले एसियन गेम्सको १९ औं संस्करणमा पदक विजेता खेलाडीलाई नगरपरिक्रमा सहित सम्मान गर्ने भएको छ ।
आईतबार चीनमा सम्पन्न एसियाडमा नेपालले एक रजत र एक कास्य पदक जितेको छ । एसियन गेम्समा कराँतेबाट एरिका गुरुङ र महिलाको कबड्डी टिमले रजत पदक जितेका थिए ।
पदक विजेता खेलाडीलाई मंगलबार नगरपरिक्रमा सहित सम्मान गर्ने कार्यक्रम रहेको राखेपका निमित्त सदस्य सचिव सम्राट कुशारीले बताए ।
‘पदक विजेता खेलाडी सहितको टोलीलाई स्केटिङमार्फत नगरपरिक्रमा गराउने र राखेप परिसर पुर्याएर सम्मान गर्ने कार्यक्रम तय भएको छ । पदक विजेता खेलाडी र अफिसियललाई राज्यकोतर्फबाट सम्मान गरौं भनेर कार्यक्रम राखिएको हो ।’ कुशारीले भने ।
बिहान ११ बजे त्रिभुवन अन्तराष्ट्रिय बिमानस्थलबाट सुरु हुने र्याली गौशाला, चावहिल, नारायण गोपाल चोक, प्रहरी प्रशिक्षण प्रतिष्ठान, लैनचौर, केशर महल, दरवारमार्ग, भद्रकाली, शहिद गेट हुँदै दशरथ रंगशालामा पुगेर समापन हुने कार्यक्रम रहेको छ ।
१९ औं संस्करणमा सहभागी हुन चीन गएको नेपालको टिम मंगलबार स्वदेश फर्कदैछ ।
