'ए' डिभिजन लिग : शीर्ष तीनको होडमा थ्री स्टार र आर्मी

काठमाडौं । पल्सर सहिद स्मारक ए डिभिजन लिग अन्तर्गत आज (शुत्रबार) दुई खेल हुदैछ । पहिलो खेलमा सरस्वती युथ क्लब र त्रिभुवन आर्मी क्लब तथा दोस्रो खेलमा विभागीय टिम पुलिस र थ्री स्टारबीच प्रतिस्पर्धा हुनेछ । दुवै खेल ललितपुरको सातदोबाटोस्थित एन्फा टेक्निकल सेन्टरमा हुनेछ ।

दुवै खेलमा भिड्न लागेका चार टोलीको लक्ष्य भनेको जित निकाल्दै तालिकामा सुधार गर्नु हो । मनाङ आठाैँ पटक लिग च्याम्पियन भएपछि बाँकी ठुला क्लब शीर्ष तीन भित्र रहेर लिग अन्त्य गर्न चाहन्छन् ।

थ्री स्टार १० खेलबाट २३ अंक सहित तेस्रो स्थानमा छ । पुलिसलाई हराउँदै दोस्रो स्थानमा उक्लिने अवसर ललितपुरे क्लबलाई प्राप्त छ । पुलिस १५ अंक सहित सातौ स्थानमा छ ।

आजै हुने पहिलाे खेलमा विभागीय टिम आर्मी समेत सरस्वतीलाई हराउँदै अंकमा सुधार गर्न चाहन्छ । शीर्ष तीन भित्र पर्ने लक्ष्य बोकेको आर्मीका लागि आज जित्नैपर्ने दबाब समेत छ । आर्मी १८ अंक सहित चौथो स्थानमा र सरस्वती १० अंक सहित तालिकाको दशाैँ स्थानमा छ ।