क्रिकेटमा नेपाल र भारत भिड्दै

काठमाडौं । एसियन गेम्सको पुरुष क्रिकेटमा नेपाल र भारत सोमबार बिहान भिड्दैछन् । नेपाली समय अनुसार बिहान पौने ७ बजे दुवै टोलीबीचको प्रतिस्पर्धा सुरु हुनेछ । 

समूह चरणका दुवै खेलमा जित निकाल्दै नेपाल क्वार्टरफाइनल प्रवेश गरेको हो । भारतले सिधै अन्तिम ८ मा स्थान पाएको थियो । 

नेपालले समूह चरणमा मंगोलिया र माल्दिभ्समाथि शानदार जित सहित नकआउट चरणमा स्थान बनाएको हो । चीनमा नेपाल उत्कृष्ट लयमा देखिन्छ । 

कुशल मल्ल, कप्तान रोहित पौडेल सहितका खेलाडी उत्कृष्ट फर्ममा देखिन्छन् । अघिल्लो दुई खेलमा उत्कृष्ट प्रर्दशन गरेको नेपाली टिमलाई हान्जाओको पिचले सहयोग पुर्याउने अपेक्षा गरिएको छ । 

युवा स्टार खेलाडीलाई समावेश गर्दै एसियन गेम्समा पठाएको भारतले स्वर्ण पदकलाई मुख्य लक्ष्य बनाएको छ । पछिल्लो संस्करणको इन्डियन प्रिमियर लिग क्रिकेट आईपीएलमा उम्दा प्रर्दशन गरेका खेलाडीलाई भारतले टिममा स्थान दिएको छ । 

आईपीएलका उत्कृष्ट प्रर्दशन गरेका ऋतुराज गायकवाडदेखि अर्शदीप सिंह, रिङ्कु सिंह, यशस्वी जयसवाल लगायतका खेलाडी भारतीय टिममा छन् । भारतको पहिलो रोजाईको टिम आईसीसी वान डे विश्वकप क्रिकेटको तयारीमा छ । 
दुवै टिम जित निकाल्दै सेमिफाइनलमा स्थान पक्का गर्ने योजनामा हुनेछन् । नेपालले समूह चरणका दुवै खेलमा २ सय भन्दा बढी रन बनाएकाले भारतविरुद्ध उत्कृष्ट ब्याटिङको अपेक्षा गरिएको छ ।