काठमाडौं । पल्सर सहिद स्मारक ए डिभिजन लिग अन्तर्गत आज (आईतबार) दुई खेल हुदैछ । दशौं चरणको अन्तिम दिन विभागीय डर्बीमा एपीएफ र त्रिभुवन आर्मी तथा दोस्रो खेलमा पुलिस र मनाङ प्रतिस्पर्धा गर्दैछन् । दुवै खेल ललितपुरको सातदोबाटोस्थित एन्फा टेक्निकल सेन्टरमा हुनेछ ।
पहिलो खेलमा भिड्न लागेका एपीएफ र आर्मीबीचको खेल बिहान ११ बजे सुरु हुनेछ । व्यवहारिक रुपमा उपाधि होडबाट बाहिरिसकेको दुवै टोली अंक तालिकामा सुधार गर्ने लक्ष्यमा छन् । आर्मीको लक्ष्य शीर्ष तीन भित्र रहेर लिगको अन्त्य गर्नु रहेको छ । आर्मी १८ अंक सहित तालिकाको चौथो स्थानमा र एपीएफ १३ अंक सहित आठौ स्थानमा छ ।
आजै हुने दोस्रो खेलमा पुलिस र मनाङबीच प्रतिस्पर्धा हुनेछ । उपाधि होडको नजिक रहेको मनाङ प्रतियोगितामा शतप्रतिशत जित निकाल्ने एक्लो टोली हो । विभागीय टिम पुलिसलाई पराजित गर्दै अंक तालिकामा पाँच अंकको अग्रता लिने अवसर मनाङलाई प्राप्त छ ।
दशौँ चरणको खेलमा संकटा र थ्री स्टारको बराबरी खेल्दा त्यसको प्रत्यक्ष फाईदा मनाङलाई देखिएको छ । मनाङ २७ अंक सहित शीर्ष स्थानमा रहदाँ पुलिस १५ अंक सहित पाँचौ स्थानमा छ ।