नेपाल भर्सेस कुवेत : हेड टु हेड
काठमाडौं । पुरुष साफ च्याम्पियनसिप फुटबलको १४ औं संस्करण आज बुधबारबाट भारतमा सुरु हुँदैछ ।
बैंगलोरस्थित श्री कांतिराव स्टेडियममा हुने उद्घाटन खेलमा समूह 'ए' मा रहेको नेपाल र कुवेतबीच प्रतिस्पर्धा हुनेछ ।
साविक उपविजेता समेत रहेको नेपाल र कुवेतबीचको उद्घाटन खेल नेपाली समय अनुसार ३:४५ बजे सुरु हुनेछ ।
बलियो टिम कुवेतविरुद्ध नेपाल उत्कृष्ट प्रदर्शन गर्ने योजनासहित मैदान उत्रनेछ । कुवेत पनि पहिलो खेलमै जित निकाल्ने योजनामा रहेको छ ।
हेड टु हेड कस्तो ?
कुवेत नेपालका लागि नौलो प्रतिद्वन्दी हैन । नेपालले हालसम्म कुवेतविरुद्ध ९ खेल खेलिसकेको छ ।
तर, कुवेतविरुद्ध नेपालको नतिजा सुखद छैन । नेपालले कुवेतसँगको ९ भेटमा ८ खेलमा पराजय व्यहोरेको छ । नेपालले मात्र एक पटक कुवेतविरुद्ध बराबरीको नतिजा निकालेको छ ।
नेपालले सन् १८८२ नोभेम्बरमा भएको एसियन गेम्समा पहिलो पटक कुवेतसँग खेलेको थियो । सो खेलमा नेपाल कुवेतसँग ३–१ गोल अन्तरले पराजित भएको थियो ।
दोस्रो भेट सन् १९८६ को एसियन गेम्समा भएको थियो । नेपाल ५–० गोल अन्तरले पराजित भयो ।
सन् १९९४ मा भएको एसियन गेम्समा नेपालले कुवेतसँग सबैभन्दा खराब नतिजा निकाल्यो । नेपाल ८–० गोल अन्तरले पराजित भएको थियो ।
सन् २००० मा भएको एसियन गेममा कुवेतसँग नेपाल ५–० गोल अन्तरले पराजित हुन पुग्यो ।
कुवेतविरुद्ध नेपालको लगातार चार हारको श्रृङ्खला सन् २०१९ को मार्चमा रोकियो । जोहान कालिनको नेतृत्वमा मार्च २१ गरे भएको मैत्रीपूर्णमा नेपालले कुवेतलाई गोलरहित बराबरीमा रोक्न सफल भएको थियो । यो नै कुवेतविरुद्ध नेपालको राम्रो नतिजा थियो ।
यस्तै २०१९ कै मार्च २५ मा भएको दोस्रो मैत्रीपूर्णमा नेपाल कुवेतसँग १-० ले पराजित भयो ।
विश्वकप छनोट अन्तर्गत २०१९ कै सेप्टेम्बर ५ मा भएको खेलमा भने नेपालले कुवेतविरुद्ध ७-० को हार व्यहोरेको थियो।
नेपालले कुवेतसँग २०१९ को नोभेम्बर १९ मा खेलेको थियो । विश्वकप छनोट अन्तर्गत भुटानमा भएको खेलमा नेपाल कुवेतसँग १-० ले पराजित भएको थियो ।
पछिल्लो पटक कुवेत र नेपालबीच गत वर्षको जेठमा प्रतिस्पर्धा भएको थियो ।
एएफसी एसियन कप छनोटको तेस्रो चरण अन्तर्गत कुवेतमा भएको खेलमा नेपाललाई घरेलु टोलीले ४-१ गोल अन्तरले हराएको थियो ।
