काठमाडौं । न्युरोड टिम एनआरटी र मछिन्द्र फुटबल क्लबले पल्सर सहिद स्मारक ’ए’ डिभिजन लिग फुटबलमा पहिलो जित निकालेको छन् । शुक्रबार भएको खेलमा जावलाखेल युथ क्लबलाई २–१ गोल अन्तरले पराजित गर्दै एनआरटीले पहिलो जित दर्ता गरेको हो ।
हल्चोकस्थित एपीएफ मैदानमा एनआरटीलाई जित दिलाउन इस्माइ यौबुए र सुशील लामाले एक एक गोल गरे । जवालाखेलका सुमन डंगोलले एक गोल फर्काए ।
पहिलो हाफको ३४ औं मिनेटमा यौबुएले गोल गर्दै एनआरटीलाई सुरुवाती अग्रता दिलाएका थिए । खेलको ५७ औं मिनेटमा सुशीलले गोल गर्दै एनआरटीलाई २–० को अग्रता दिलाए । त्यसपछि खेलको ५९ औं मिनेटमा जावलाखेलका सुमनले एक गोल फर्काएपनि टोलीको हार टार्न सकेनन् ।
जावलाखेलसंगको जितसंगै एनआरटीले १० खेलबाट ४ अंक जोडेको छ । एनआरटी अझै लिगको पुछारमा छ । पराजित जावलाखेलको ८ अंक छ । जावलाखेल दशौं स्थानमा छ ।
अर्को खेलमा मछिन्द्र फुटबल क्लबले पहिलो जित निकालेको छ । सरस्वती युथ क्लबलाई ४–२ गोल अन्तरले पराजित गर्दै मछिन्द्रले पहिलो जित निकालेको हो ।
एन्फा कम्प्लेक्स सातदोबाटोमा मछिन्द्रलाई जित दिलाउन कप्तान विशाल राई, भसाडिया डियामान्डे, अनिल गुरुङ र विकास राईले एक एक गोल गरे । सरस्वतीका फ्रान्सिस ओन्यामाले एक गोल फर्काउदा एक गोल आत्मघाती उपहार पाएको थियो ।
खेलको चौथो मिनेटमा मछिन्द्रका संजय राजबहाकको आत्माघाती गोलबाट सरस्वतीले अग्रता बनाएको थियो । उनले कर्नर बल क्लियर गर्ने क्रममा दोस्रो बार हुँदै आफ्नै पोस्टमा गोल हुन पुगेको थियो । १६ औं मिनेटमा मछिन्द्र कप्तान बिशाल राईको गोलबाट खेलमा फर्कियो । विदेशी खेलाडी डियामान्डेको कर्नर बलमा बिशालले हेडबाट गोल गर्दै खेल १–१ गोलको बराबरीमा ल्याएका थिए ।
खेलको २० औं मिनेटमा डियामान्डेले गोल गर्दै मछिन्द्रलाई २–१ को अग्रता दिलाए । काउण्टर अट्याकमा आएको बलमा डियामान्डेले सरस्वतीको किपरलाई बिट गर्दै चिप गोल गरेका थिए ।
खेलको २५ औं मिनेटमा अनिल गुरुङले गोल गर्दै मछिन्द्रको अग्रता ३–१ को बनाए । विवेक पण्डितको फ्रिकिक बलमा अनिलले हेड गोल गरेका थिए । त्यसपछि खेलको ३६ औं मिनेटमा सरस्वतीका विदेशी खेलाडी फ्रान्सिसले काउण्टर अट्याकमा गोल गर्दै खेल ३–२ को स्थितिमा ल्याए ।
पहिलो हाफमा ३–२ ले पछि परेको सरस्वतीले दोस्रो हाफमा थप गोल फर्काउन सकेन । तर, मछिन्द्रले भने थप एक गोल गर्दै खेल आफ्नो पक्षमा बनाउन सफल भयो ।
खेलको इन्जुरी समयमा विकास राईले पेनाल्टीमा गोल गर्दै मछिन्द्रलाई ४–२ को जित दिलाए । सरस्वतीका खेलाडीले विशाललाई लडाएपछि मछिन्द्रले पेनाल्टी पाएको थियो । जसमा विकासले सहजै गोल गरे । खेलमा म्यान अफ दि म्याच मछिन्द्रका कप्तान विशाल राई घोषित भए ।
पहिलो जितसंगै मछिन्द्रले १० खेलबाट ६ अंक जोड्दै ११ औं स्थानमा उक्लिएको छ । सरस्वतीले १० खेलबाट १० अंक जोडेको छ ।
अर्को खेलमा फ्रेन्ड्स क्लबले हिमालयन शेर्पा क्लबलाई पराजित गर्यो । फ्रेन्ड्सले १० खेलाडीमा सिमित हिमालयन शेर्पालाई २–१ गोल अन्तरले हराएको हो ।
एन्फा कम्प्लेक्स सातदोबाटोमा फ्रेन्ड्सलाई जित दिलाउन संजोक महर्जन र जीवन गुरुङले एक एक गोल गरे । हिमालयन शेर्पाका गोहा प्याट्रिकले एक गोल गरे ।
खेलमा सुरुवाती अग्रता भने हिमालयन शेर्पाले बनाएको थियो । खेलको २७ औं मिनेटमा प्याट्रिकले गोल गर्दै हिमालयनलाई सुरुवाती अग्रता दिलाएका थिए । तर, २८ औं मिनेटमा संजोक महर्जनले गोल गर्दै फ्रेन्ड्सलाई बराबरीमा ल्याए ।
दोस्रो हाफमा हिमालयन शेर्पा १० खेलाडीमा समेटियो । हिमालयन शेर्पाका आशिष गुरुङले दोहोरो पहेलो कार्डसहित रातो कार्ड पाएर मैदानबाट बाहिरिएका थिए । खेलको ८८ औं मिनेटमा जीवनले गोल गर्दै फ्रेन्ड्सलाई २–१ को महत्वपूर्ण जित दिलाए । खेलमा फ्रेन्ड्सका संजोक महर्जन म्यान अफ दि म्याच चुनिए ।
जितसंगै फ्रेन्ड्सले १० खेलबाट ८ अंक जोड्दै तालिकाको ११ औं स्थानमा उक्लिएको छ । पराजित हिमालयन १४ अंक जोडेर लिगको छैटौं स्थानमा छ ।
