काठमाडौं । पल्सर सहिद स्मारक 'ए' डिभिजन लिग फुटबलमा फ्रेन्ड्स क्लबले हिमालयन शेर्पा क्लबलाई पराजित गरेको छ । शुक्रबार भएको खेलमा फ्रेन्ड्सले १० खेलाडीमा सिमित हिमालयन शेर्पालाई २ - १ गोल अन्तरले हराएको हो ।
एन्फा कम्प्लेक्स सातदोबाटोमा फ्रेन्ड्सलाई जित दिलाउन संजोक महर्जन र जीवन गुरुङले एक एक गोल गरे । हिमालयन शेर्पाका गोहा प्याट्रिकले एक गोल गरे ।
खेलमा सुरुवाती अग्रता भने हिमालयन शेर्पाले बनाएको थियो । खेलको २७ औं मिनेटमा प्याट्रिकले गोल गर्दै हिमालयनलाई सुरुवाती अग्रता दिलाएका थिए । तर, २८ औं मिनेटमा संजोक महर्जनले गोल गर्दै फ्रेन्ड्सलाई १ - १ को बराबरी ल्याए ।
दोस्रो हाफमा हिमालयन शेर्पा १० खेलाडीमा समेटियो । हिमालयन शेर्पाका आशिष गुरुङले दोहोरो पहेलो कार्डसहित रातो कार्ड पाएर मैदानबाट बाहिरिए । जसको फाइदा फ्रेन्ड्सले उठायो ।
त्यसपछि खेलमा फ्रेन्ड्सका जीवन गुरुङ चम्किए । खेलको ८८ औं मिनेटमा जीवनले गोल गर्दै फ्रेन्ड्सलाई २ -१ को महत्वपूर्ण जित दिलाए ।
खेलमा फ्रेन्ड्सका संजोक महर्जन म्यान अफ दि म्याच चुनिए ।
जितसंगै फ्रेन्ड्सले १० खेलबाट ८ अंक जोडेको छ । र, फ्रेन्ड्स लिगको ११ औं स्थानमा उक्लिएको छ । पराजित हिमालयन १४ अंक जोडेर लिगको छैटौं स्थानमा छ ।
