काठमाडौं । माल्दिभ्समा आज बुधबारबाट सुरु हुने फाइभ नेसन्स पुरुष बास्केटबल च्याम्पियनसिपको पहिलो खेलमा नेपालले भुटानसँग खेल्ने भएको छ ।
माल्दिभ्स बास्केटबल संघले आयोजनामा हुने प्रतियोगिताको सो खेल नेपाली समय अनुसार अपरान्ह पौने ५ मा सुरु हुनेछ ।
पहिलो खेल भएकोले दुवै टोली जितका साथ प्रतियोगिताको सुरुआत गर्न चाहन्छ ।
नेपालले दोस्रो खेल पाकिस्तानसँग बिहीबार खेल्नेछ । नेपालले बंगलादेशसँग शनिबार तेस्रो खेल खेल्नेछ।
यस्तै नेपालले लिगको आफ्नो अन्तिम खेल आउँदो आइतबार घरेलु टोली माल्दिभ्ससँग खेल्नेछ ।
जुन २२ तारिखसम्म हुने प्रतियोगितामा नेपालसहित दक्षिण एसियाका पाँच राष्ट्रको सहभागीता रहेको छ ।
प्रतियोगितामा नेपाल सहित माल्दिभ्स, बंगलादेश, भुटान र पाकिस्तानले राउन्ड रोविन लिगका आधारमा प्रतिस्पर्धा गर्ने छन् । शीर्ष दुई टोलीले फाइनल खेल्ने छ ।
प्रशिक्षकमा विपिन कपाली र नृपेश श्रेष्ठ तथा व्यवस्थापक सुशील गुरुङ छन् । फिबा रेफ्री राजकुमार महर्जनले प्रतियोगितामा निर्णायको भूमिका निर्वाह गर्ने छन् ।
नेपाली टोली
सदिश प्रधान (कप्तान), विनोद महर्जन (उप कप्तान), विजय बुर्जा, निकेश राखल मगर, मविन्द्र भण्डारी, अजय कुश्वाहा, दिवेश्वर शाह, आयुश सिंह, निश्चल महर्जन, मनीष केसी, अशिम श्रेष्ठ र श्रेयशबहादुर शाह
