काठमाडौं । नेपाली राष्ट्रिय फुटबल टोलीका कप्तान तथा गोलकिपर किरण चेम्जोङले १४ औं संस्करणको साफ च्याम्पियनसिप अर्को स्तरको हुने बताएका छन् ।
साफको तयारी अन्तर्गत मैत्रीपूर्ण खेलेका लागि फिलिपिन्स प्रस्थान गर्नु अघि बोल्दै कप्तान किरणले साफ बाहिरको दुई टोली सामेल हुने भएकाले यस पटकको साफ अर्को लेभलको हुने बताएका हुन् ।
'यस पटक फरक छ । मिडलइस्ट टोली पनि आउदैछ । दुई टोली आउने भएको कारण यो पटकको साफ अर्को लेभलको हुन्छ जस्तो लाग्छ मलाई । यो पटकको साफमा चुनौती छ । बिगतको भन्दा प्रतिस्पर्धात्मक हुने देख्छु,' कप्तान किरणले ।
भारतको बेंगलुरुमा आयोजना हुने १४ औं संस्करणको साफ च्याम्पियनसिप असार ६ देखि १८ गतेसम्म हुनेछ । यस पटक कुवेत र लेबनानले आमन्त्रित टोलीको रुपमा साफ खेल्ने छन् ।
साफको तयारी अन्तर्गत नेपालले बिहीबार फिलिपिन्ससँग एक मैत्रीपूर्ण खेल खेल्नेछ । नेपाल फिलिपिन्सबाटै भारत जाने छन् ।
'खेलाडीहरु नयाँ छन् । ट्रेनिङ राम्रो भएको छैन । यो समय कठिन छ । तर, अहिले हामी फिलिपिन्ससँगको खेलमा केन्द्रित छौँ,' किरणले थपे ।
मुख्य प्रशिक्षक भिन्सेन्जो अल्बर्टो एनेसेले साफका लागि २३ सदस्यीय नेपाली टोलीको घोषणा गरिसकेका छन् ।
डिफेन्डर विमल पाण्डे, सिमान्त थापा र मिडफिल्डर लाकेन लिम्बुले राष्ट्रिय टोलीमा पहिलो पटक स्थान बनाएका छन् ।
मुख्य प्रशिक्षक एनेसले साफ भन्दा अहिले आफु फिलिपिन्ससँगको खेलमा केन्द्रित रहेको बताए ।
यस संस्करणको च्याम्पियनसिपमा नेपालसहित आयोजक भारत, बंगलादेश, कुवेत, लेबनान, भुटान, पाकिस्तान, माल्दिभ्सले सहभागिता जनाउने छन् ।
साफमा नेपाल समूह 'ए' मा रहेको छ । नेपालको समूहमा साविक विजेता भारत, कुवेत र पाकिस्तान रहेको छ ।
समूह 'बी' मा लेबनान, माल्दिभ्स, भुटान र बंगलादेश रहेको छ ।
साफको उद्घाटन खेलमा नेपाल र कुवेतबीच प्रतिस्पर्धा हुनेछ । असार ६ गते हुने नेपाल र कुवेतबीचको उद्घाटन खेल नेपाली समय अनुसार पौने ४ बजे सुरु हुनेछ ।
दोस्रो खेलमा नेपालले ९ असारमा आयोजक भारतसँग खेल्नेछ । तेस्रो तथा समूह चरणको अन्तिम खेलमा १२ असारमा पाकिस्तानविरुद्ध खेल्नेछ ।
माल्दिभ्समा आयोजना भएको १३ औं साफ च्याम्पियनसिपमा नेपाल उपविजेता बनेको थियो । नेपाल उपाधि भिडन्तमा भारतसँग ३-० ले पराजित भएको थियो ।
