पुलिसलाई बराबरीमा रोक्न ब्रिगेड ब्वाईज सफल

काठमाडौं । पल्सर सहिद स्मारक ए डिभिजन लिगमा विभागीय टिम पुलिस क्लबले ब्रिगेड ब्वाईजसंग बराबरी खेलेकाे छ । ललितपुरको सातदोबाटोस्थित एन्फा कम्प्लेक्समा भएको खेलमा पुलिसले तालिकाकाे पुछार तिर रहेका ब्रिगेड ब्वाईजसंग १–१ गोलको बराबरी खेलेको हो ।

खेलको ५ औ मिनेटमा ब्रिगेडले खेलमा अप्रत्यासित अग्रता लिएको थियो । ब्रिगेडका रितिक खड्काले गोल गरेका थिए ।

७५ औ मिनेटमा पुलिस बराबरी गोल गर्न सफल रह्यो । पुलिसका अभिषेक रिजालले हेडमार्फत गोल गर्दै खेल बराबरीमा ल्याएका थिए । उनले हेम तामाङको क्रसलाई सदुपयोग गर्दै दोस्रो बार च्यापेर गोल गरे ।

खेलमा सुरुवातबाटै बिग्रेडलाई दबाबमा राखेको पुलिसले गोल गर्न भने सकेन । १६ औ मिनेटमा सन्तोष हेमरुङको पासमा कप्तान भरत शाहले हेडिङ पोल नजिकैबाट बाहिरियो ।
२१ औ मिनेटमा तेज तामाङको कर्नरमा दिनेश राजबंशी हेड बल ब्रिगेका सुजित बुढाथोकीले गोल लाईनबाट बचाएका थिए ।

अंक बाँड्न परेपछि पुलिसको ९ खेलबाट १४ अंक भएको छ । पुलिस तालिकाको पाँचौ स्थानमा यथावत छ । ब्रिगेड ५ अंक सहित तालिकाको ११ औ स्थानमा उक्लिएको छ ।

पुलिसका हेम तामाङ 'म्यान अफ दी म्याच' घाेषित भएका थिए ।