काठमाडौं । पल्सर सहिद स्मारक ए डिभिजन लिगमा हिमालयन शेर्पा क्लबले न्युरोड टिम एनआरटीलाई पराजित गरेको छ । ललितपुरको सातदोबाटोस्थित एन्फा कम्प्लेक्समा सोमबार भएको खेलमा हिमालयन शेर्पाले एनआरटीलाई १–० गोल अन्तरले हराएको हो ।
हिमालयन शेर्पाको जितमा विश्वास श्रेष्ठले पहिलो हाफको अन्तिम मिनेटमा बिजयी गोल गरे । एकल प्रयासमा बल अघि बढाउँदै उनी गोल गर्न सफल भएका थिए ।
एनआरटीविरुद्व आक्रमक खेल पस्किएको शेर्पा क्लबले दोस्रो हाफमा गोलका सुन्दर मौकाहरु गुमाएको थियो । ६१ औ मिनेटमा विश्वास श्रेष्ठको पासमा आशिष गुरुङको प्रहारलाई डिफेन्डर सरोज तामाङले गोल लाईनबाट क्लियर गरेका थिए ।
७१ औ मिनेटमा शेर्पाका कप्तान मानबहादुर तामाङको पासमा विदेशी खेलाडी प्याट्रिकले डिबक्स भित्रबाट प्रहार गरेको बल पोस्ट नजिकैबाट बाहिरिएको थियो । लगत्तै मानबहादुरको प्रहार एनआरटीका गोलरक्षक अजित प्रजापतिले रोकेका थिए ।
७६ औ मिनेटमा एनआरटीले खेल बराबरी गर्ने मौका गुमायो । अशोक थापाको प्रहार पोस्ट बारमा लागेर बाहिरिएको थियो ।
जितसंगै हिमालयन शेर्पा तालिकाको छैटौ स्थानमा उक्लिएको छ । उसले ९ खेलबाट १४ अंक जोडेको छ । पुलिससंग समान अंक भएपनि गोल अन्तरका आधारमा शेर्पा क्लब पछाडी परेको हो ।
एनआरटीले नवौ चरणको खेल सम्म समेत जित निकाल्न सकेको छैन । एक अंक जोडेको एनआरटी तालिकाको पुछारमा छ ।
