काठमाडौं । पल्सर सहिद स्मारक ए डिभिजन लिग अन्तर्गत आज नवौँ चरणका खेल सुरु हुदैछ । प्रतियोगिता अन्तर्गत आज तीन खेल हुनेछ । पहिलो खेलमा न्युरोड टिम एनआरटी र हिमालयन शेर्पा क्लबबीच प्रतिस्पर्धा हुनेछ । एन्फा टेक्निकल सेन्टरमा हुने खेल बिहान ११ बजे सुरु हुनेछ ।
प्रतियोगितामा जित निकाल्न नसकेको एनआरटीलाई पराजित गर्दै अंक तालिकामा माथि उक्लिन हिमालयन शेर्पा क्लबलाई अवसर छ । शेर्पा क्लब ११ अंक सहित तालिकाको सातौ स्थानमा छ । एनआरटी एक अंक जोडेर तालिकाको पुछारमा छ ।
सोही मैदानमा दिउँसो साढे २ बजे सरस्वती युथ क्लब र जावलाखेल युथ क्लबबीच प्रतिस्पर्धा हुनेछ । लयमा देखिन संघर्षरत दुवै क्लब महत्वपुर्ण तीन अंक जाड्दै तालिकामा स्थान सुधार गर्ने लक्ष्यमा छन् । नवौ स्थानमा रहेको सरस्वतीको ९ अंक छ । जावलाखेल ७ अंक सहित १० औ स्थानमा छ ।
हलचोक मैदानमा दिउँसो साढे २ बजे हुने खेलमा संकटा क्लबले फ्रेन्ड्स क्लबसंग खेल्नेछ । जारी लिगमा उत्कृष्ट प्रर्दशन गरिरहेको संकटालाई कमजोर देखिएको फ्रेन्ड्सविरुद्व जित निकाल्दै शीर्ष स्थानको मनाङ माथि दबाब राख्ने अवसर छ ।
संकटा २१ अंक सहित तालिकाको तेस्रो स्थानमा छ । संकटा शीर्ष स्थानको मनाङ भन्दा मात्र ३ अंकले पछाडी छ । फ्रेन्ड्स ५ अंक सहित तालिकाको ११ औ स्थानमा छ ।