उपाधि होडमा मनाङ बलियो, आर्मी १–० ले पराजित

काठमाडौं । सहिद स्मारक 'ए' डिभिजन लिगमा सिग्नेचर मनाङ मर्स्याङ्दी क्लबले त्रिभुवन आर्मी क्लबलाई पराजित गरेको छ । ललितपुरको एन्फा टेक्निकल सेन्टरमा भएको खेलमा मनाङलाई विजयी गराउन एक मात्र गोल विशाल राईले गरे ।

खेलको ३१ औ मिनेटमा विशालले गरेकाे गोल मनाङलाई उपाधि यात्रामा अघि बढाउन पर्याप्त बन्यो ।

जितसंगै मनाङले लिग तालिकामा ३ अंकको अग्रता लिएको छ । आर्मी १७ अंक सहित तालिकाको चाैथाे स्थानमा छ ।

प्रतियोगितामा पहिलो हार ब्यहोरेको आर्मी उपाधि होडमा कमजोर बनेको छ ।

मनाङविरुद्व मुख्य तीन स्ट्राईकरलाई मैदान उतारेपनि आर्मीले गोल गर्न सकेन । दुवै टोलीले खेल अवधिभर पर्याप्त गोलका अवसर सिर्जना गरेका थिए ।

खेलको छैटौ मिनेटमा मनाङका एडेलाजाकाे प्रहार आर्मीका किपर बिकेश कुथुले बचाएका थिए । २६ औ मिनेटमा आर्मीका नवयुग श्रेष्ठको हेडिङलाई मनाङका बिशाल श्रेष्ठले पन्च गरेर बाहिर फालेका थिए ।

पहिलो हाफको ईन्जुरी समयमा समेत आर्मीका जर्जप्रिन्सले प्रहार गरेको फ्रिकिकलाई मनाङका गोलकिपर बिशालले उत्कृष्ट बचाउ गरे ।

पहिलो हाफको अन्तिम समयमा एक्लो प्रयास गर्दै मनाङका ओलावाले अफिजले गरेको प्रहारलाई विकेश कुथुले सुन्दर ढङ्गले बचाउ गरिदिए ।

दोस्रो हाफमा आक्रमक देखिएको आर्मीले एक पछि अर्को अाक्रमण बुनेपनि त्यसलाई गोलमा परिणत गर्न सकेन । ४७ औ मिनेटमा कप्तान भरत खवासको क्रसमा नवयुग श्रेष्ठले डि बक्सभित्र बाट गरेको हेड सिधै किपरको हातमा परेको थियो ।

जर्ज प्रिन्सले ५३ औ मिनेटमा १८ यार्ड टाढाबाट हानेको बल पोस्ट माथिबाट बाहिरिएको थियो । ५८ औ मिनेटमा दिनेश हेन्जन हेडमार्फत मिलाईदिएको पासमा नवयुग गोल गर्न चुके ।

यता मनाङले समेत दोस्रो हाफमा अग्रता दोब्बर पार्ने थुप्रै मौका गुमायो ।

६० औ मिनेटमा कमल श्रेष्ठको क्रसमा अडिलाजाले गरेको हेड आर्मीका किपरले सहजै बचाएका थिए । ६८ औ मिनेटमा मनाङका विराजको पासमा एडिलाजाको प्रहारलाई आर्मीका डिफेन्डर जितेन्द्र कार्कीले रोकेका थिए । त्याे समय अार्मीका किपर ठिक पाेजिसनमा थिएनन् ।

 ७६ औ मिनेटमा मनाङको अर्को सुन्दर मौका गुमायो । भिक्टोरले डि बक्सभित्र हानेको बल पोस्टमा लागेर फर्किएको थियो ।

खेल सकिन एक मिनेट बाँकी छदाँ आर्मीका कप्तान भरतले प्रहार गरेको कर्नरमा विमल पाण्डेको हेड पोस्ट नजिकैबाट बाहिरिएको थियो ।

पछिल्लाे पराजयले अार्मीकाे उपाधि हाेड कमजाेर बनेकाे छ । जारी लिगमा अार्मीलार्इ पहिलाे हार चखाएकाे मनाङ सबै खेलमा जित  निकाल्ने एक्लाे टाेली हाे ।