काठमाडौं । सहिद स्मारक ए डिभिजन लिगमा विभागीय टिम पुलिसले फेन्ड्स क्लबविरुद्व सुरुवती अग्रता बनाएको छ । ललितपुरको सातदोबाटोस्थित एन्फा टेक्निकल सेन्टरमा भएको खेलमा पुलिसले पहिलो हाफको खेल सकिदाँ २–० को अग्रता बनाएको हो ।
खेलको तेस्रो मिनेटमा रवि पासवानको पासलाई सदुपयोग गर्दै अभिषेक रिजालले किपर बिट भएको अवस्थामा गोल गरे । २० औ मिनेटमा उनै रविले पुलिसको अग्रता दोब्बर बनाए । हेम तामाङको पासलाई सदुपयोग गर्दै किपर बिट भएको अवस्थामा उनले गोल गर्न सफल भए ।
पुलिसले पाँचौ मिनेटमा अग्रता दोब्बर बनाउने मौका गुमाएको थियो । कप्तान भरत शाहको प्रहार बारमा लागेर फर्किएको थियो । २४ औ मिनेटमा काउन्टर बलमा रबि शंकरले प्रहार गरेको बल पोस्ट नजिकैबाट बाहिरिएको थियो ।
२९ औ मिनेटमा पुलिस फेरी गोल गर्न चुक्न पुग्यो । फ्रेन्ड्सका गोलकिपर देब लिम्बु बिट भएको अवस्थामा भरतले प्रहार गरेको बल पोस्ट बाहिर जान पुग्यो ।
पुलिस ७ खेलबाट ११ अंक सहित तालिकाको पाँचौ स्थानमा छ ।
विभागीय टिम शीर्ष स्थानको मनाङ भन्दा १० अंकले पछाडी परेको छ । फ्रेन्ड्स ५ अंक सहित ११ औ स्थानमा छ ।
