काठमाडौं । राष्ट्रिय खेलकुद परिषद राखेपले आठौ राष्ट्रिय खेलकुद प्रतियोगिताका लागि तेक्वान्दोको जिल्ला छनोट रोक्न जिल्ला खेलकुद विकास समितिलाई निर्देशन दिएको छ ।
तेक्वान्दोमा दुई संघ अस्तित्वमा रहदाँ काम गर्न नसकिने निष्कर्श सहित राखेपले राष्ट्रिय खेलकुदको जिल्ला छनोटमा तेक्वान्दोलाई समावेश नगर्न परिपत्र जारी गरेको हो ।
प्रदेश नम्बर ५ मा हुने आठौ राष्ट्रिय खेलकुदको जिल्ला छनोट अहिले चलिरहेको छ । राखेपले मंसिर १४ देखि २१ सम्म सम्पुर्ण खेलको जिल्ला छनोट सक्ने गरि कार्यतालिका सार्वजनीक गरेको थियो ।
राखेपले दुई संघ एक नहुदाँसम्म राष्ट्रिय खेलकुदमा तेक्वान्दोलाई सहभागि नगराउने स्पष्ट पारेको छ । राखेपको १ सय १० औ बोर्ड बैठकले तेक्वान्दो विवाद समाधान गर्न आग्रह गर्दै दुवै संघलाई एक साताको समय दिएको थियो ।
तर दुवै संघ आ आफ्ना अडानमा कायम रहदाँ औपाचारिक वार्ता प्रक्रिया समेत अघि बढ्न सकेको थिएन । दुवै संघ मिल्न नसक्दा छुट्टै कमिटि गठन गरेर तेक्वान्दोलाई अघि बढाउने तयारी खेलकुद मन्त्रालयको छ ।
दुई वटा संघ अस्तित्वमा रहेका कारण अन्तराष्ट्रिय प्रतियोगितामा नेपालको नतिजा खराब आएको निष्कर्श सहित राखेपले दुवै संघलाई एक बनाएर अघि बढाउने तयारी गरेको छ ।
दुवै संघ अस्तित्वमा रहदाँ १८ औ एसियाडमा तेक्वान्दोतर्फ खराब नतिजा आएको राखेपको निष्कर्श छ । अन्तराष्ट्रिय प्रतियोगितामा गौरवमय ईतिहास कोरेको तेक्वान्दो अहिले आन्तरिक विवादको चपेटामा छ ।
राष्ट्रिय तेक्वान्दो संघ र नेपाल तेक्वान्दो संघ अस्तित्वमा रहदाँ एकीकृत खेल गतिविधि अघि बढ्न सकेको छैन । राष्ट्रिय तेक्वान्दो संघका अध्यक्ष शिव कोईरालाले विवाद समाधानका लागि आफुहरुले वार्ता कमिटि गठन गरेपनि संवाद प्रक्रिया अघि बढ्न नसकेको स्विकारे ।
‘कमिटि समेत गठन गरेको हो । निष्कर्श निस्कन सकेन । मिल्न नसकेपछि जिल्ला छनोट रोकिएको हो ।’ उनले भने, ‘अब मन्त्रालयले दुवै पक्षबीच समन्वयको काम अघि बढाउन आवश्यक छ ।’
तेक्वान्दोका दुवै संघ अस्तित्वको लडाँईमा जुधिरहदाँ खेलाडी भने राष्ट्रिय खेलकुद प्रतियोगिता खेल्ने अवसरबाट बञ्चित हुने अवस्था आएको छ ।
