'नेपालको विकेट ब्याटिङको लागि एकदम मिठो छ'

काठमाडौं । पछिल्लो दुई हप्तामा नेपालले घरेलु मैदानमा उत्कृष्ट ब्याटिङ गर्दै आएको छ । नेपालले दुई हप्तामा घरेलु मैदानमा ६ खेल खेलिसकेको छ । नेपालले दुई एकदिवसीय अन्तर्राष्ट्रिय खेल्दा चार टी-ट्वान्टी अन्तर्राष्ट्रिय खेल खेलेको छ । नेपालले एकदिवसीयमा सबै खेल हार्दा टी-ट्वान्टीमा सबै खेल जितेको छ ।

खेलेको ६ खेलमा नेपालले सानदार ब्यटिङ गर्यो । सबै खेल गरेर तीन शतक र चार अर्धशतक बनायो। पपुवा न्युगिनीविरुद्ध एकदिवसीयको पहिलो खेलमा रोहित पौडेलले १ सय २६ रन बनाउँदै शतक प्रहार गरे । लगत्तै अर्को खेलमा दिपेन्द्र सिंह ऐरीले १ सय ५ रनको शतकीय इनिङ खेले । दुई खेलमा दुई खेलाडीले घरेलु मैदानमा शतक प्रहार गरेको यो पहिलो पटक हो । शतक प्रहार भएपनि नेपालले पपुवा न्युगिनी (पीएनजी)सँग दुवै खेलमा पराजय भोग्यो । दुई खेलमा नेपालले ५ सय ६४ रन बनायो । 

त्रिकोणात्मक टी-ट्वान्टी अनतर्राष्ट्रिय सिरिजमा समेत नेपालले राम्रो ब्याटिङलाई निरन्तरता दियो । नेपालले चार खेलमा ७ सय २६ रन बनाएको छ । जसमा नेपालका ३ खेलाडीले अर्धशतक र एक शतक बनाए ।

रोहितले मलेसियाविरुद्ध आफ्नो करियरको पहिलो टी-ट्वान्टी अनतर्राष्ट्रियको अर्धशतक बनाउँदा दिपेन्द्रले १ सय १० रनको अविजित शतकीय इनिङ खेल्दै टी-ट्वान्टी अनतर्राष्ट्रियमा एक इनिङमा सर्वाधिक रन बनाउने नेपाली खेलाडी बने ।

त्यसअघि पीएनजीविरुद्ध दिपेन्द्रले ६६ रनको अर्धशतकीय इनिङ खेलेका थिए । दिपेन्द्रले ८ दिनमा २ शतक र १ अर्धशतक बनाएका हुन् । नेपालमा सिरिज सुरु हुनु अघि नेपालले यूएईमा आईसीसी विश्वकप लिग टु खेल्दा दिपेन्द्र खराब लयमा थिए । तर नेपाल आएसँगै दिपेन्द्रले उत्कृष्ट प्रदर्शनलाई निरन्तरता दिएका छन् । त्यसको श्रय नेपाली कप्तान सन्दीप लामिछानेले पिचलाई समेत दिएका छन् ।

'जुन तरिकाले १३/१४ ओभरको खेल चल्दै थियो, मलाई लागेको थियो की २ सय ३५ सम्म पुग्छ होला लागेको थियो तर २ सय २३ रन समेत एक ठुलो स्कोर नै हो । अझै पनि हामीले केहि रन थप गर्न सक्नु पर्थ्यो । सुरुमा २ विकेट गुमाएर पनि यहाँ सम्म पुग्नु एकदम ठुलो सफलता हो ।' टी-ट्वान्टी अनतर्राष्ट्रिय सिरिजको मलेसियाविरुद्धको खेलपछि भने, 'यो राम्रो लक्षण हो कि नेपालमा विकेटहरु राम्रो पाइराखेका छौं, ब्याटिङको लागि राम्रो छ । तर बलरहरुलाई यो विकेटमा गारो छ । आउने दिनहरुमा विकेटहरु राम्रो भइराख्यो भने क्रिकेटको लागि राम्रो हुन्छ ।' 

यस्तै अहिलेको त्रिविको विकेटले बलरहरुलाई गारो हुने समेत सन्दीपले बताए । 'विकेट राम्रो छ, बलरले एक इन्चपनि तलमाथि बल फाल्यो भने त्यो बलरहरुको लागि एकदम नराम्रो हुन्छ । विकेट ब्याटिङको लागि एकदम मिठो छ, एकदम राम्रो विकेट छ ।' सन्दीपले थपे, 'गत वर्ष खेलेको सिरिजमा भन्दा पनि एकदम राम्रो विकेट छ । त्यसैले बलरहरुले आफ्नो योजनालाई राम्रोसँग लागु गर्नु जरुरी छ । एउटा सानो गलत बलले बाउन्ड्री जान सक्छ ।'  

सन् २०२१ मा नेपालले नेदरल्याण्ड र मलेसियासँग त्रिकोणात्मक सिरिज खेलेको थियो । उक्त सिरिजमा समेत नेपालले उत्कृष्ट ब्याटिङ प्रदर्शन गर्दै सिरिज जितेको थियो ।   

सन्दीपले टिम निकै राम्रो लय र आकारमा रहेको र ब्याटिङ प्रदर्शनले आफुलाई कप्तानको रुपमा सहज भएको समेत बताएका छन् । 'टिम एक दम राम्रो आकारमा छ । सबैजनाले जिम्मेवारी बहन गर्दै छन् ।अझै पनि सुधार गर्नु पर्ने केही कुराहरु छन् ।' उनले थपे, 'विश्वकप छनोटमा हाम्रो ब्याटिङ खासै चलेको थिएन । तर अहिले विकेटले पनि साथ दिएको छ र ब्याटिङ यसरी चल्नु भनेको हाम्रो लागि सकारात्मक लक्षण हो । लिडरको हिसाबमा मलाई यस कुराले सहज बनाएको छ ।'

विश्वकप छनोट र लिग टुमा ब्याटिङ नचलेको नेपालको घरेलु भूमिमा राम्रो हुनुमा विकेट र ब्याटरको दृष्टिकोण रहेको सन्दीपको बुझाइ छ । 'अहिले ब्याटरको अप्रोच राम्रो छ र त्यसमा विकेटले राम्रो साथ दिएको छ । जब तपाइले यस्तो विकेट पाउनु हुन्छ कन्फिडेन्स आफै आउँछ । बल मज्जाले ब्याटमा आएको छ र चाहेको स्थानमा बल हान्न सक्नु भएको छ भने समय लिगेर पनि लक्ष्य चेज गर्न वा सोचेको लक्ष्य दिन सक्नु हुन्छ ।' उनले भने, ' ओभरअल सबै कुरा मिल्दा ब्याटिङ राम्रो भएको छ । दुवई र ओमानमा खेल्दा खासै रनहरु बनिरहेको थिएन । आउट फिल्डपनि छिटो छ नेपालमा । यस्तो विकेटले गर्दा मलेसिया, पीएनजीले समेत राम्रो ब्याटिङ गरेको छ । यो सत्य हो कि तपाई यो विकेट राम्रो छैन भन्न सक्नु हुन्न । यो पालि विकेट एकदम राम्रो छ ।'  

घरेलु मैदानमा टी-ट्वान्टी अन्तर्राष्ट्रियको आंकडा नेपालको बलियो छ । नेपालले घरेलु मैदानमा १२ खेल खेल्दा ११ खेलमा सहज जित निकालेको छ । 

नेपालले घरेलु भूमिमा १२ पटक टी-ट्वान्टी अन्तर्राष्ट्रिय खेल खेलेको छ । जसमा नेपालले ६ पटक २ सय रन पार गरेको छ । सन् २०२१ मा नेपालले नेदरल्याण्डविरुद्ध ३ विकेट गुमाएर २ सय ३८ रन बनाएको स्कोर टी-ट्वान्टी अन्तर्राष्ट्रिय खेल आफ्नो उत्कृष्ट स्कोर हो जुन घरेलु मैदानमा सम्भव भएको थियो ।

घरेलु मैदानमा टी-ट्वान्टी अन्तर्राष्ट्रिय खेल्दा २ नेपाली खेलाडीले शतक बनाएका छन् । टी-ट्वान्टी अन्तर्राष्ट्रियमा नेपालको लागि ४ खेलाडीले शतक बनाउँदा २ शतक घरेलु भूमिमा सम्भव भएको हो । यस्तै नेपाली खेलाडीले २२ पटक टी-ट्वान्टी अन्तर्राष्ट्रिमा अर्धशतक बनाउँदा घरेलु मैदानमा मात्र ११ अर्धशतक बनाएको रेकर्ड छ ।