न्युजिल्यान्डविरुद्ध  इंग्ल्यान्डको रोमान्चक जित

काठमाडौं । आईसीसी महिला विश्वकपमा न्युजिल्यान्डविरुद्ध इंग्ल्यान्डले रोमान्चक जित निकालेको छ ।

घरेलु टोली न्युजिल्यान्डलाई १ विकेटले पराजित गर्दै इंग्ल्याण्डलले सेमिफाइनल सम्भावना जिवितै राखेको छ । 

इडेन पार्क, अक्ल्याण्डमा २ सय ४ रनको लक्ष्य पछ्याएको इंग्ल्यान्डले ४७ ओभर २ बलमा ९ विकेट गुमाएर लक्ष्य पुरा गर्यो । इंग्ल्यान्डको जितमा नाट सेभरले सर्वाधिक ६१ रनको अर्धशतकीय इनिङ खेलिन् ।

यस्तै सोफिया डंकले ३३, कप्तान हेथर नाइट ४२ र ट्यामी ब्यूमोन्टेले २५ रनको योगदान गरिन् ।

न्युजिल्यान्डकी फ्रान्सिस म्याकेले ४ विकेट लिइन् । जेस केरले २ विकेट हात पारिन्  ।

त्यसअघि टस हारेर ब्याटिङ थालेको न्युजिल्यान्ड ४८ ओभर ५ बलमा २ सय ३ रनमा अल आउट भयो । न्युजिल्यान्डकी म्याडी ग्रीनले ७५ बलमा ५२ रनमा अविजित रहिन् ।

कप्तान शोफी डेविन ४२, सुजी बेट्स २२, अमेला केर र एमी सेटरवेथ समान २४/२४ रनमा आउट भइन् । इंग्ल्यान्डकी केट क्रस र सोफी एक्टेस्टोेनले समान ३/३ विकेट हात पारिन् । चार्ली डीनले २ विकेट लिइन् ।

इंग्ल्यान्ड ५ खेलमा २ मा जित र ३ मा हार सहित पाँचौं स्थानमा छ । अष्ट्रेलिया ५ खेलमा ५ मानै जितका साथ शीर्षस्थानमा रहँदै सेमिफाइनलमा पुगिसकेको छ । दक्षिण अफ्रिका ४ खेलमा ८ अंकका साथ दोस्रो स्थानमा छ ।