काठमाडौं । सुदुरपश्चिम प्रदेशले ललितपुर मेयर महिला टी–ट्वान्टी च्याम्पियनशीपको फाइनल प्रवेश गर्ने सम्भावना बलियो बनाएको छ ।
टियु क्रिकेट मैदानमा शुक्रबार प्रदेश नं. १ लाई ६ विकेटले पराजित गर्दै फाइनलको सम्भावना बलियो बनाएको हो ।
सुदुरपश्चिमले तीन खेलमध्ये दुईमा हात पारेको छ । यता प्रदेश १ ले भने तीन मध्ये दुई खेलमा पराजय भोगेको छ र उसको फाइनल प्रवेश गर्ने सम्भावना कमजोर बनेको छ ।
५ टिमको सहभागिता रहेको प्रतियोगिताको शीर्ष स्थानमा भने तीन खेल जितेको नेपाल एपीएफ क्लब रहेको छ ।
लुम्बिनी प्रदेशले भने दुई मध्ये एक खेलमा जित हात पारेको छ । लगातार तीन खेलमा पराजय भोगेको ललितपुर मेयर्स ११ भने प्रतियोगिताबाट बाहिरिसकेको छ ।
शुक्रबारको खेलमा ५३ रनको लक्ष्य सुदुरपश्चिमले १० ओभरमा ४ विकेट गुमाएर पुरा गर्यो ।
सुदुरपश्चिमको जितमा बिन्दु रावलले सर्वाधिक २७ रनको योगदान गरिन् ।
कप्तान रितु कनौजियाले ९ रन जोडिन् ।
प्रदेश १ का लागि कप्तान रुविना क्षेत्रीले २ विकेट हात पारिन् ।
अलिसा खडियाले एक विकेट लिइन् ।
यसअघि टस जितेर पहिले ब्याटिङ गरेको प्रदेश १ ले १८ दशमलब ४ ओभरमा सबै विकेट गुमाउदै ५२ रन मात्र जोड्न सक्यो ।
प्रदेश १ का लागि संगिता राईले १२ तथा सबनम राईले १० रन जोडे ।
सुदुरपश्चिमका लागि इश्वरी विष्टले सर्वाधिक ४ विकेट हात पारिन् ।
कविता जोशी र सम्झना खड्काले समान दुई–दुई विकेट लिए ।
कविता कुँवर र रितु कनौजियाले एक–एक विकेट हात पारे ।
-1738250810.jpeg)
