एपीएफ फाइनल नजिक, ललितपुर बाहिरियो

काठमाडौं । नेपाल एपीएफ क्लब ललितपुर मेयर महिला टी–ट्वान्टी च्याम्पियनशीपको फाइनल नजिक पुगेको छ । 

टियु क्रिकेट मैदानमा ललितपुर मेयर्स ११ लाई ७ विकेटले पराजित गर्दै एपीएफ फाइनल नजिक पुगेको हो । 

एपीएफको यो लगातार तेस्रो जित हो । यता लगातार तीन पराजय भोग्दै ललिपुर मेयर्स भने प्रतियोगिताबाट बाहिरिएको छ । 

शुक्रबारको खेलमा ८१ रनको लक्ष्य एपीएफले १३ ओभरमा मात्र ३ विकेट गुमाउदै पुरा गर्यो । 

एपीएफको जितमा ज्योती पाण्डेले अर्धशतकिय इनिङ्स खेलिन् । ज्योतीले ४५ बलमा अविजित ५६ रन जोड्दा ११ चौका प्रहार गरिन् ।

रोमा थापा ११ रनमा अविजित रहिन् ।

ललितपुर मेयर्सका लागि अनुराधा चौधरीले एक विकेट हात पारिन् ।

यस अघि टस जितेर पहिले ब्याटिङ गरेको ललितपुर मेयर्सले निर्धारित २० ओभरमा ५ विकेट गुमाउदै ८० रन जोड्यो ।

ललितपुर मेयर्सका लागि सुमन खतिवडाले सर्वाधिक ३० रन जोडिन् । आरती विडारी २१ रनमा अविजित रहिन् ।

एपीएफका लागि करुणा भण्डारी र सुमन विष्टले एक–एक विकेट हात पारे ।