के सजिलो छ त नेपालका लागि विश्वकपको यात्रा ?
काठमाडौ । फेब्रुअरी १८ देखि २४ तारिखबाट ओमानमा हुने आईसीसी पुरुष टी–ट्वान्टी विश्वकप ग्लोबल छनोटले यसै वर्ष अष्ट्रेलियामा हुने विश्वकपका लागि दुई टोलीको टुंगो लगाउने छ ।
यदि आठ वर्षपछि फेरी एक पटक विश्वकप खेल्नु छ भने नेपाल ती दुई टोली मध्ये एक हुनु पर्नेछ ।
अर्थात अक्टुबर १६ तारिखबाट अष्ट्रेलियामा सुरु हुने टी–ट्वान्टी विश्वकपमा स्थान बनाउने नेपालले ग्लोबल छनोटमा फाइनलसम्मको यात्रा तय गर्न पर्छ ।
तर त्यस अघि भने सेमिफाइनलसम्म पुग्नु पनि नेपालका त्यति सजिलो भने पक्कै हुनेछैन ।
नेपाल ग्लोबल छनोटको समूह ‘ए’ मा रहेको छ र यसै समूहमा क्यानाडा, आयोजक ओमान, फिलिपिन्स, बहराईन, जर्मनी, आयरल्यान्ड र युएई जस्ता टिम रहेका छन् ।
यस समूहलाई पुन वर्गिकरण गरिएको छ र ८ टिमलाई दुई समूहमा विभाजन गरिएको छ ।
नेपाल भने पहिलो समूहमा क्यानाडा, ओमान र फिलिपिन्ससँग रहेको छ ।
र फाइनल अघि सेमिफाइनलको यात्रा तय गर्न नेपालले चार टिममध्ये शीर्ष दुईमा पर्नुपर्नेछ ।
तर यो भने त्यति सजिलो पक्कै पनि हुनेछैन ।
नेपालका मुख्य प्रशिक्षक पुबुदु दासानायकेकै भनाईलाई मान्ने हो भने चार टोली मात्र रहेको समूहमा नेपाललाई कुनै पनि खेलमा गल्ति गर्ने छुट हुनेछैन ।
‘छनोटमा १४ देखि १६ टिम भयो भने छनोट हुने मौका धेरै हुन्छ । किनभने कुनै एउटा खराब दिनबाट पछि माथि उठ्न सक्छौ । तर चार टिम भएको समूहमा हामीले खराब दिनको बारेमा सोच्न सक्दैनौ, सबै खेलमा राम्रो खेल्नै पर्छ,’ दासानायकेले एक अन्तरकृयाका क्रममा भनेका थिए ।
किनभने ओमानले केही महिना अघि मात्र टी–ट्वान्टी विश्वकप खेलेको थियो ।
ओमानले विश्वकपमै पपुआ न्यूगिनीलाई पराजित गर्दा बंगलादेशलाई कडा चुनौती दिएको थियो ।
दासानायकेका अनुसार ओमानले पछिल्लो समय राम्रो क्रिकेट खेलिरहेको छ र उनीहरुलाई नेपालले पराजित गर्नेपर्ने हुन्छ ।
‘हामी उनीहरुको लेभल भन्दा पर छैनौ । हामी उनीहरु भन्दा राम्रो पनि गर्न सक्छौ । तर हामीले उनीहरुमाथि जित हात पार्न राम्रो क्रिकेट खेल्नुपर्छ,’ दासानायकेले थपेका थिए ।
अर्कोतर्फ नेपालको अर्का प्रतिद्धन्दी क्यानाडाले पनि विश्वकप छनोट जस्ता प्रतियोगितामा राम्रो क्रिकेट खेल्दै आएको छ ।
नेपालका लागि चिरपरिचित टिम पनि हो । र क्यानाडाले नेपालको विश्वकप सपनालाई तुहाउन पनि सक्छ ।
अर्कोतर्फ फिलिपिन्स नेपालका लागि नौलो टिम हो र नेपाली टिमका प्रशिक्षक दासानायकेले फिलिपिन्सलाई पनि सहज नलिने बताइसकेका छन् ।
‘समग्रमा हामीले राम्रो क्रिकेट खेल्नुपर्छ’ दासानायके बताउछन् ।
समूहमा शीर्ष दुई स्थान हात पारेपनि नेपाललाई विश्वकपसम्म पुग्नका लागि अर्को चुनौती भनेको सेमिफाइनलमा आयरल्यान्ड वा युएईविरुद्ध खेल्नु रहनेछ ।
आयरल्यान्डले पनि भर्खरै विश्वकप खेलेर आएको छ र जनवरीमै वेस्ट इन्डिजविरुद्धको तीन खेलको एकदिवसिय सिरिज २–१ ले जितेको थियो ।
हुन त ग्लोबल छनोट अघि नेपालले आफ्नै समूहमा रहेको ओमान साथै अर्को समूहमा रहेका युएई र आयरल्यान्डविरुद्ध टी–ट्वान्टी सिरिज खेल्ने तालिका रहेको छ ।
सो सिरिजले पनि नेपाललाई ती टिमहरुको बारेमा बुझ्ने र मुख्य प्रतियोगिताका लागि रणनीति तय गर्ने अवसर प्रदान गर्नेछ ।
