आर्मीमाथि पुलिसको जित

काठमाडौं । पीएम कप राष्ट्रिय टी–ट्वान्टी क्रिकेट प्रतियोगिता अन्तर्गत नेपाल पुलिस क्लबले लगातार दोस्रो जित दर्ता गरेको छ । 

समूह ‘ए’ अन्तर्गत टियु क्रिकेट मैदानमा विभागिय टोली त्रिभुवन आर्मी क्लबलाई ४ विकेटले पराजित गर्दै पुलिसले लगातार दोस्रो जित दर्ता गरेको हो । 

सोमबार पुलिसले आफ्नो पहिलो खेलमा सुदुरपश्चिम प्रदेशलाई २ रनले पराजित गरेको थियो । 

आर्मीले भने सोमबार पहिलो खेलमा कर्णाली प्रदेशलाई ६३ रनले पराजित गरेको थियो । 

मंगलबारको खेलमा जितका लागि चाहिएको १ सय ३८ रनको लक्ष्य पुलिसले १८ ओभरमा ६ विकेट गुमाएर पुरा गर्यो ।

पुलिसका लागि कुशल भुर्तेलले ३५ रन जोडे । उनले २२ बलको सामना गर्दा पाँच चौका र एक छक्का हिर्काए । 

रासिद खानले १९ बलमा २८ रन बनाए । उनले चार चौका र एक छक्का प्रहार गरे । 

दिलिप नाथले २५ रनमा अविजित रहे । 

अनिल साहले २२ रनको योगदान गरे । अनिलले ११ बल खेल्दै एक चौका र दुई छक्का प्रहार गरेका थिए । 

आर्मीका लागि साहाव आलमले सर्वाधिक तीन विकेट हात पारे । 

जितेन्द्र मुखियाले दुई र कुशल मल्लले एक विकेट लिए । 

यस अघि टस हारेर पहिले ब्याटिङ गरेको आर्मी निर्धारित ओभरको एक बल बाँकी छदा १ सय ३७ रनमा अलआउट भएको थियो । 

आर्मीका लागि कप्तान विनोद भण्डारीले सर्वाधिक ४४ रन जोड्दा सोमपाल कामीले ४२ रनको योगदान गरे । 

पुलिसका करण केसीले सर्वाधिक चार विकेट हात पारे । 

गुल्सन झा र योगेन्द्र सिंह कार्कीले समान दुई–दुई विकेट लिदा आरिफ शेख र दिपेन्द्र सिंह ऐरीले एक–एक विकेट हात पारे । 

यस जितसँगै पुलिसले २ खेलमा ४ अंक जोडेको छ । पुलिस समूह ए को शीर्ष स्थानमा उक्लिएको छ ।

आर्मी २ खेलमा २ अंक जोडेर दोस्रो स्थानमा रहेको छ ।