अष्ट्रेलियाविरुद्ध जोनीको शतक

काठमाडौं । अष्ट्रेलियाविरुद्धको चौथों टेस्टमा इंग्ल्यान्डका जोनी बेयरस्टोले शतक पु्रा गरेका छन् ।

एसेस सिरिज अन्तर्गत सिड्नीमा जारी टेस्टको तेस्रो दिनको समाप्तीसँगै जोनी १ सय ३ रनमा नटआउट रहेका छन् ।

अष्ट्रेलियाले ८ विकेट गुमाएर ४ सय १६ रनमा पहिलो इनिङ्स समाप्तीको घोषणा गरेपछि ब्याटिङ गरिरहेको इंग्ल्यान्डले भने तेस्रो दिनको समाप्तीमा २ सय ५८ रन जोड्दा ७ विकेट गुमाएको छ । 

बेन स्टोक्स ६६ रन तथा मार्क उड ३९ रनमा आउट भए । 

अष्ट्रेलियाका लागि कप्तान प्याट कमिङ्स र स्कट बोलान्डले समान दुई–दुई विकेट लिए ।

माइकल स्टार्क, क्यामरन ग्रिन र नथन लायनले एक–एक विकेट लिए । 

यस अघि अष्ट्रेलियाले उसमान खवाजाको १ सय ३७ रनको मदतमा ८ विकेट गुमाएर ४ सय १६ रन जोडेको थियो ।

पाँच टेस्टको सिरिज अष्ट्रेलियाले ३–० ले जितिसकेको छ ।