काठमाडौं । नेपाली राष्ट्रिय क्रिकेट टिमका मुख्य प्रशिक्षक पुबुदु दसानायकेले नेपाल क्रिकेट संघ (क्यान) र खेलाडीबीच देखिएको विवाद समाधान भएको बताएका छन् ।
राष्ट्रिय टिमको प्रशिक्षण अघि टियु क्रिकेट मैदानमा संचारकर्मीसँग कुरा गर्दै पुबुदुले समस्या समाधान भएको बताएका हुन् ।
पुबुदुले क्रिकेटमा देखिएको समस्या समाधान हुँदा सबै खुशी भएको समेत बताए ।
' केहि समस्याहरु थियो । तर, हामी समाधान गर्न सफल भयौं । सबै खुशी छौँ । मलाई आशा छ भोलि वा केहि दिनमा पुरै टिमको प्रशिक्षण सुरु हुनेछ,' पुबुदुले भने ।
ओमानमा आयोजना हुने आईसीसी पुरुष टि-ट्वान्टी विश्वकपको ग्लोबल छनोटका लागि नेपाली टोलीको प्रशिक्षण सुरु भएको हो ।
पहिलो दिनको प्रशिक्षणमा १४ खेलाडी उपस्थित भएका छन् । बाँकी १६ खेलाडी भने कोभिड-१९ को पीसीआर नगरेको कारण उपस्थित भएका छैनन् ।
प्रशिक्षक पुबुदुले टिम अहिले एकै लक्ष्यमा रहेको समेत बताए ।
'हामीबीच धेरै सकारात्मक छलफल भयो । सबैले बुझेका छन् । हामी एक लक्ष्यमा काम गरिरहेका छौँ,' उनले भने, 'मेरो विचारमा यो मुद्दा समाधान भएको छ ।'
पूर्व कप्तान ज्ञानेन्द्र मल्लसहित चार खेलाडीलाई कारबाही गरेपछि क्यान र खेलाडीबीच विवाद उत्कर्षमा पुगेको थियो।
क्यानले गत महिना ज्ञानेन्द्र मल्ललाई हटाएर सन्दीप लामिछानेलाई कप्तान चयन गरेको थियो । क्यानले कप्तान मल्लसँगै उपकप्तान दीपेन्द्र सिंह ऐरीलाई समेत जिम्मेवारीबाट हटाउने निर्णय गरेको थियो।
यस्तै क्यानले मल्ल र दीपेन्द्रसहित सोमपाल कामी र कमल सिंह ऐरीलाई सन् २०२२ को केन्द्रिय सम्झौताबाट सुरुको ६ महिनाको लागि सहभागी नगराउने निर्णय गरेको थियो ।
जसको कारण कारबाहीमा परेका पूर्व कप्तान मल्ल, उपकप्तान दीपेन्द्र सिंह ऐरी, सोमपाल कामी र कमल सिंह ऐरीसहित १४ खेलाडीले प्रशिक्षणका लागि रिपोर्टिङ गरेका थिएनन् ।
तर, क्यानले कारबाहीमा परेका चार खेलाडीलाई सेन्ट्रल कन्ट्रयाक्टको ग्रेडिङमा समावेश गराउने भएपछि सहमति बनेको हो । र, खेलाडी प्रशिक्षणमा फर्कन राजी भएका थिए ।
यस्तै प्रशिक्षक पुबुदुले विश्वकप छनोटका लागि टिमका लागि तयारी प्रयाप्त रहेको समेत बताए ।
'मलाई तयारीको चिन्ता छैन किनकी हामीसँग प्रयाप्त समय रहेको छ,' उनले थपे ।
