आर्मीको दुबै टिम फाइनलमा

काठमाडौं । त्रिभुवन आर्मी क्लबका महिला र  पुरुष टिम स्व. खुम बहादुर खड्का स्मृति तेस्रो राष्ट्रिय टेबल टेनिस प्रतियोगिताको टिम इभेन्ट्सतर्फ फाइनलमा प्रवेश गरेका छन् ।

महिलातर्फ पहिलो सेमिफाइनलमा आर्मीले नेपाल पुलिस क्लबलाई ३-१ अन्तरले पराजित गर्यो । आर्मीकी रबिना महर्जनले पुलिसकी मन्जु सुवाललाई ३-०, स्वेच्छा नेम्वाङले सोनु थापा मगरलाई ३-१ तथा सोनु र मन्जुले रबिना र स्वेच्छालाई ३-१ पराजित गरेको हो । त्यसपछि रबिनाले सोनुलाई ३-० ले हराएपछि आर्मी फाइनलमा पुगेको हो ।

दोस्रो सेमिफाइनलमा एपीएफले ललितपुरलाई ३-० सेट अन्तरले पराजित गरेको छ । एपीएफकी अनिता महर्जनले सतिस्मा थापालाई ३-०, दिक्षा तामाङले प्रनिका कुंवरलाई ३-०, दिक्षा र अनिताले सतिस्मा र प्रनिकालाई ३-०सेट अन्तरले पराजित गरेर फाइनलमा स्थान बनाएको हो ।

यस्तै पुरुषतर्फको  पहिलो सेमिफाइनलमा नेपाल पुलिस क्लबले एपीएफलाई ३-० सेटले पराजित गरेको छ । पुलिसका बिनेस खनियाले एपीएफका संयोग कपालिलाई ३-१ ले, स्यान्टु श्रेष्ठले अमरलाल मल्ललाई ३-० ले, बिनेस र स्यान्टुले संयोग र अमरलाललाई ३-० को सेटले पराजित गर्दै फाइनलमा स्थान बनाएको हो ।

दोस्रो सेमिफाइनलमा आर्मीले रुपन्देहीलाई ३-१ सेटले पराजित गरेको छ ।

आर्मीका दिप साउनले रुपन्देहीका प्रबेश बस्नेतलाई ३-० ले, कृष्ण थापा मगरलाई नारायण घिमिरेले २-३ ले, एलेक्स र दिपले नारायण र प्रबेशलाई ३-१ ले र दिपले नारायणलाई ३-१ सेटले पराजित गर्दै फाइनलमा स्थान बनाएको हो ।