काठमाडौं । यूएईमा जारी यू-१९ एसिया कप प्रतियोगितामा सहभागिता जनाएर नेपाली यू-१९ राष्ट्रिय क्रिकेट टोली बुधबार स्वदेश फर्किएको छ ।
प्रतियोगिता नेपालको लागि सहभागितामा सिमित रह्यो । समूह चरणको तीन खेल मध्ये तिनै खेलमा हार ब्यहोरेको नेपाल निराश हुँदै घर फर्किएको छ ।
टेष्ट राष्ट्र बंगलादेश र श्रीलंकासंग पराजित नेपाल कमजोर आँकिएको कुवेतसँग समेत पराजित भयो ।
प्रतियोगितामा टेस्ट राष्ट्रलाई चकित पार्दै सेमिफाइनल पुग्ने लक्ष्य लिएको नेपाल कुवेतसँग पराजित हुँदा आफै चकित हुन पुग्यो ।
पहिलो खेलमा यु-१९ विश्वकप विजेता बंगलादेशसँग १ सय ५४ रनको फराकिलो हार व्यहोर्यो । दोस्रो खेलमा श्रीलंकासंग ६० रनले पराजित हुँदा अन्तिम खेलमा कुवेतले १ विकेटले नेपाललाई पाखा लगायो ।
नेपालको बलियो पक्ष सधै बलिङ रहँदै आएको छ तर यस प्रतियोगितामा नेपालले बलरनै पाउन सकेन । नेपालको खराब प्रदर्शनको मुख्य कारण ‘एक्सपोजर’ रह्यो ।
प्रतियोगिताका लागि दुबई जानुअघि खेलाडीले यू-१९ राष्ट्रिय क्रिकेट प्रतियोगिता खेले । १२ दिने उक्त प्रतियोगिताबाट खेलाडी छनोट गर्दै नेपाल क्रिकेट संघ (क्यान) ले खेलाडी छनोट गर्यो र करिब दुई साताको क्याम्प राख्यो । दुई विभागीय टोलीविरुद्ध अभ्यास खेल खेल्दै नेपाल प्रतियोगितामा ठुलो लक्ष्य बोकेर यूएई पुगेको थियो ।
यू-१९ एसिया कप इतिहासमा हालसम्म नेपाल सेमिफाइनल भन्दा माथि पुग्न सकेको छैन । सन् २०१७ मा नेपालले राहुल द्रभिडको भारतीय टोलीलाई पराजित गर्दै यू-१९ एसिया कपको सेमिफाइनल तय गरेको थियो।
भारतलाई पराजित गर्नु नेपालको ऐतिहासिक उपलब्धि थियो । किनकि नेपालले कुनै पनि क्रिकेटमा भारतलाई पराजित गर्न सकेको थिएन । त्यसयताको संस्करणमा नेपालले समूह चरण पार गर्न सकेको छैन ।
लामो समय भएको छैन, नेपाली यू-१९ क्रिकेट टिम देख्दा केहि टेस्ट राष्ट्र शतर्क हुने गर्थे । कारण थियो नेपाली युवा टोलीले यू-१९ विश्वकपमा गर्दै आएको प्रदर्शन ।
यू-१९ विश्वकपमा नेपालको गर्विलो इतिहास छ । नेपालले विश्वकपमा जिम्बाबे, बंगलादेश, आयरल्याण्ड, न्युजिल्यान्ड र दक्षिण अफ्रिका जस्ता राष्ट्रलाई पराजित गरिसकेको छ ।
नेपालले हालसम्म यू-१९ विश्वकपमा सात संस्करणमा प्रतिस्पर्धा गरिसकेका छन् । सन् २००० मा नेपालले पहिलो पटक यू-१९ विश्वकप खेलेको थियो । जसमा नेपालले आठौं स्थान प्राप्त गर्दै इतिहास रचेको थियो ।
यस्तै नेपालले खेलेको सन् २०१६ को अन्तिम यू-१९ विश्वकप नेपालले आठौं स्थान हात पारेको थियो । सन् २०१६ पछि नेपालले लगातार तीन विश्वकप गुमाएको छ ।
सन् २०१८ मा न्युजिल्याण्डमा भएको र सन् २०२० मा दक्षिण अफ्रिकामा भएको विश्वकप नेपालले गुमाएको छ भने आउँदो सन् २०२२ को यू-१९ विश्वकपमा समेत छनोट भएको छैन । नेपालले सन् २००० देखि २००८ सम्म लगातार ५ संस्करणमा लगातार यू-१९ विश्वकप खेल्यो ।
सन् २०१६ अघि नेपालले सन् २०१० र सन् २०१४ को यु-१९ विश्वकपमा छनौट हुन असफल भएको थियो । तर सन् २०१६ पछी लगातार तेस्रो पटक विश्वकप छनौट हुन सकेको छैन । नेपालले लगातार विश्वकप गुमाउन थालेको इतिहासमा पहिलो पटक हो ।
सन् २०१८ को विश्वकप छनोटमा युएईले नेपाललाई डीएल मेथडमा १ रनले पराजित गरेको थियो । सोहि हारनै नेपालको विश्वकप छनौटमा बाधा बन्न पुग्यो । सन् २०२० को छनोटमा भने नेपालको खराब प्रदर्शनको कारण विश्वकप पुग्न असफल भयो ।
सन् २०२२ मा हुने विश्वकपको लागि कोरोना महामारीको कारण छनोट प्रतियोगिता नहुँदा यूएईले सिधै मौका पायो र नेपालको विश्वकप पुनरागमन सपना पुन: सपनामा सिमित रह्यो ।
इतिहासमा नेपाली युवा टोलीको प्रदर्शन गर्विलो रहेपनि पछिल्लो समय युवा टोलीले आफ्नो लय गुमाउदै आएको छ । लगातार विश्वकप खेल्ने र टेस्ट राष्ट्र पराजित गर्ने नेपाली टोली अहिले विश्वकप छनोट हुन समेत सकेको छैन ।
विश्वकप संस्करणमा टेस्ट राष्ट्र पराजित गर्दै आएको नेपालले सन् २०१६ देखि विश्वकपबाट बन्चित हुँदै आएको छ भने सन् २०१७ यता कुनै टेस्ट राष्ट्रलाई हराउन गर्न सकेको छैन ।
यू-१९ टोलीका खेलाडीनै राष्ट्रिय टोलीका बलिया सम्भावना हुन् । अधिकांश यू-१९ टिमबाट खेलाडीहरुले नेपाली राष्ट्रिय टोलीमा स्थान बनाउँदै आएका छन् । बलियो यू-१९ टोली नै बलियो राष्ट्रिय टोलीको प्रतिक हो ।
