सन्दीप चम्किदा होबार्टको जित

काठमाडौं । नेपाली लेग स्पिनर सन्दीप लामिछाने आबद्द होबार्ट हरिकेन्सले बिग बास लिग (बीबीएल) टी-ट्वान्टी क्रिकेटमा जित निकालेको छ ।

बुधबार भएको खेलमा होबार्टले मेलबर्न रेनेगेड्सलाई ८५ रनले हराएको हो ।

होबार्टले दिएको २ सय ७ रनको लक्ष्य पछ्याएको रेनेगेड्स १५ ओभर ५ बलमा १ सय २१ रनमा अलआउट भयो ।

रेनेगेड्सका साम हार्परले ५७ रनको अर्धशतकीय इनिङ्स खेले ।

होबार्टका सन्दीपले ३ ओभर ५ बलमा ३२ रन खर्चिएर ३ विकेट लिए ।

यस्तै टम रोजर्सले ३ विकेट लिए ।

यस अघि पहिले ब्याटिङ गरेको होबार्टले २० ओभरमा ५ विकेट गुमाएर २ सय ६ रन बनाएको थियो ।

होबार्टका बेन म्याकडेरमोटले १ सय २७ रनको शतकीय इनिङ्स खेले । टम डेभिडले ३० रन जोडे ।

रेनेगेड्सका रेची टोप्लेले २ विकेट लिए ।

यस जितसँगै होबार्ट १७ अंक जोडेर तेस्रो स्थानमा रहेको छ ।

रेनेगेड्स ५ अंक जोडेर पुछारमा रहेको छ ।