यू-१९ एसिया कप :  नेपाल जितविहीन

काठमाडौं । एसीसी यू-१९ एसिया कप क्रिकेट अन्तर्गत समूह चरणको आफ्नो अन्तिम खेलमा नेपाल पराजित भएको छ ।

दुबईको आईसीसी एकेडेमीमा मंगलबार भएको खेलमा नेपाल कुवेतसँग १ विकेटले पराजित भएको हो ।

नेपालले दिएको २ सय ४० रनको लक्ष्य कुवेतले ४८ ओभर ५ बलमा ९ विकेट गुमाएर पूरा गर्यो ।

कुवेतका लागि कप्तान मित भाब्सरले अविजित रहदै १ सय ७५ रनको शतकीय इनिङ्स खेले ।

जुड साल्दन्हाले २५ रन जोडे । अन्य खेलाडीले दोहोरो अंक जोड्न सकेनन् ।

नेपालका गुलशन झाले ३ विकेट लिए । शेर मल्ल, बसिर अहमेद र विवेक यादवले २/२ विकेट लिए ।

यस अघि टस हारेर पहिले ब्याटिङ गरेको नेपालले ४२ ओभर ३  बलमा अलआउट हुँदै २ सय ३९ रन बनाएको थियो ।

नेपालका लागि बसिर अहमेद र विवेक मगरले अर्धशतकीय इनिङ्स खेले । अहमेदले ५६ रनको इनिङ्स खेल्दा विवेकले ५० रन बनाए ।

यस्तै मोहमद आदील आलमले ४९ तथा शेर मल्लले २१ रन बनाए । अर्जुन साउद १०, गुलशन झा ७, देव खनाल ५ , सन्तोष कार्की ५ तथा विवेक यादव सुन्य रनमा आउट भए ।

दिपेश कँडेल १५ रनमा आउट हुँदा र प्रकाश जैशी ५ रनमा अविजित रहे ।

कुवेतका मिर्जा अहमेद र अब्दुल साकिदले ३/३ तथा हेनरी थोमस र मोहमद बासटाकीले २/२ विकेट लिए ।

यस हारसँगै समूह बी को नेपाल अंकविहीन रहदै समूह चरणबाट बाहिरिएको छ ।

नेपाल समूहको पुछारमा रह्यो । कुवेतले भने सान्त्वना जित निकालेको छ ।

पहिलो खेलमा नेपाल टेस्ट राष्ट्र बंगलादेशसँग १ सय ५४ रनले पराजित भएको थियो। यस्तै दोस्रो खेलमा नेपाल टेस्ट राष्ट्र श्रीलंकासँग ६० रनले पराजित भएको थियो ।

यस समूहबाट बंगलादेश र श्रीलंकाले सेमिफाइनलमा स्थान बनाएका छन् ।