काठमाडौं । एसीसी यू-१९ एसिया कप क्रिकेटमा टेस्ट राष्ट्र श्रीलंकाले नेपाललाई जितका लागि ३ सय २३ रनको फराकिलो लक्ष्य प्रस्तुत गरेको छ ।
सारजाह क्रिकेट मैदानमा टस जितेर पहिले ब्याटिङ गरेको श्रीलंकाले ५० ओभरमा ४ विकेट गुमाएर ३ सय २२ रन बनायो ।
श्रीलंकाका लागि सदिशा राजपाक्षेले १ सय ३१ रनको शतकीय इनिङ्सको योगदान गरे ।
यस्तै चामिन्दु विक्रमासिंगेले १ सय ११ रनको शतकीय इनिङ्स खेले ।
कप्तान दुनिथ वेलालागेले अविजित ३४ रन जोड्दा शेभोन डानिलले १७ रन बनाए ।
नेपालका आदील आलमले २ तथा देव खनाल र विवेक यादवले १/१ विकेट लिए ।
नेपाल आज पहिलो जितको खोजीमा रहेको छ । पहिलो खेलमा नेपाल टेस्ट राष्ट्र बंगलादेशसँग १ सय ५४ रनले पराजित भएको थियो ।
नेपाल अंक विहीन रहदै समूह बी को पुछारमा रहेको छ ।
श्रीलंका भने २ अंक जोडेर दोस्रो स्थानमा रहेको छ । नेपाललाई हराएर श्रीलंका दोस्रो जित निकाल्न चाहन्छ ।
प्रतियोगिता अन्तर्गत नेपालले समूह चरणको अन्तिम खेल कुवेतविरुद्ध डिसेम्बर २८ मा खेल्नेछ ।
दुबै समूहबाट शीर्ष दुई टोली सेमिफाइनलमा प्रवेश गर्नेछन् ।
दुबै सेमिफाइनल डिसेम्बर ३० मा हुनेछ ।
फाइनल भने जनवरी १ मा हुने तालिका रहेको छ ।
