काठमाडौं । नवप्रवेशी क्लब सातदोबाटो युथ क्लबले शुक्रबार सहिद स्मारक 'ए' डिभिजन लिग फुटबलमा पहिलो जित निकाल्यो ।
त्रिपुरेश्वरस्थित दशरथ रंगशालामा शुक्रबार तीन पटकको च्याम्पियन थ्री स्टार क्लबलाई १-० गोल अन्तरले पराजित गर्दै सातदोबाटोले पहिलो जित निकालेको हो ।
ललितपुर डर्बीमा सातदोबाटोलाई जित दिलाउन सुदिप गुरुङले निर्णायक गोल गरे ।
जितपछि सातदोबाटोका मुख्य प्रशिक्षक मेघराज केसीले खेलाडीले मेहेनत गरेर खेल्दा जित निस्किएको बताए ।
'अब नयाँ टिमले थ्री स्टार जस्तो टिमसँग एकदम मेहेनत गरेर निकै राम्रो खेलेको हो,' खेलपछि केसीले भने, 'जितेर मात्र राम्रो हैन की पाएको मौकाको हिसाब गर्दा पनि उनीहरुले एक प्रहार गर्दा हामीले ६-७ वटा पोस्ट प्रहार गर्यौं । तर, स्कोरमा सुधार्नु बाँकी छ । समग्रमा सन्तुष्टि छु नयाँ केटाहरुले यत्तिको खेलिरहेको छ ।'
सातदोबाटोको यो लिगमा पहिलो जित समेत हो ।
थ्री स्टारका मुख्य प्रशिक्षक उर्जन श्रेष्ठले बल पोसेसन राख्न नसक्दा र स्ट्राइकरमा समस्या देखिदा पराजित भएको बताए ।
'आज हामीलाई अलिकति गार्हो नै भयो । प्लेईङमा खेल्ने हेमन्त थापा मगर आज डाइरिया भएर खेलेन । उसको स्थानमा अर्को खेलपनि हामीले बल होल्ड गर्न सकेनौं,' उनले भने, 'स्ट्राइकिङमा अस्ति जस्तै समस्या भयो । धेरै नै समस्या छ । एउटा विदेशी खेलाडी अनुबन्ध गर्न बाँकी छ । एक स्ट्राइकर अनुबन्धपछि ठिक होला ।'
श्रेष्ठले हेमन्त मैदान प्रवेश गरेपछि खेलमा केहि सुधार भएको बताए । उनी ८४ औं मिनेटमा मैदान प्रवेश गरेका थिए ।
'आज मिस पासहरु धेरै भयो । गार्हो नै भयो । हेमन्त आएपछि केहि ठिक भयो । हेरौं अर्को खेल के हुन्छ,' उनले थपे ।
