काठमाडौं । सहिद स्मारक 'ए' डिभिजन क्लब सातदोबाटो युथ क्लबका मुख्य प्रशिक्षक मेघराज केसीले थ्री स्टार क्लबविरुद्ध तीन अंकको लागि खेल्ने बताएका छन् ।
त्रिपुरेश्वरमा बिहीबार आयोजित प्रि म्याच कन्फरेन्समा बोल्दै प्रशिक्षक केसीले तीन अंकको लागि खेल्ने बताएका हुन् ।
'हामी तीन अंककै लागि खेल्छौं । हामी नयाँ टिम हौँ । राम्रो उपस्थिति जनाउनका लागि मेहेनत गरिरहेका छौँ । १३ औं खेलसम्म जित्नकै लागि खेल्छौं । तर, सोचेजस्तो हुँदैन,' प्रशिक्षक केसीले भने ।
सहिद स्मारक 'ए' लिगको दोस्रो चरण अन्तर्गत नवप्रवेशी सातदोबाटोले भोलि शुक्रबार थ्री स्टारविरुद्ध खेल्दैछ । दशरथ रंगशालामा सातदोबाटो र थ्री स्टारबीचको खेल दिउँसो १ बजे सुरु हुनेछ ।
थ्री स्टार बलियो टिम भएपनि आफुले त्यहिँ अनुसार तयारी गरेको उनले बताए ।
' थ्री स्टार पुरानो क्लब हो । तर, विपक्षी भनेको विपक्षी हो । म जुन क्लबमा त्यसबाहेक अन्य १३ क्लबलाई विपक्षीको रुपमा हेरेको छु,' उनले भने, ''पहिलो चरणमा थ्री स्टारको खेलाडी र खेल राम्रो देखिएको छ । त्यस अनुसार तयारी गरेका छौँ ।'
प्रशिक्षक केसीले पहिलो खेलको गल्तीमा सुधार गर्ने बताए । पहिलो खेलमा सातदोबाटोले फ्रेन्ड्स क्लबसँग गोलरहित बराबरी खेलेको थियो ।
'पहिलो खेलमा ५/६ वटा मौका पाउँदा पनि सदुपयोग भएन । त्यो समस्या लगातार दोहोरिए गार्हो हुन्छ । यो एक हप्तामा त्यसलाई सुधार्ने कोशिश गरेका छौँ,' उनले थपे, 'थ्री स्टारले पहिलो चरणमा तीन वटै गोल डिफेन्डरले डेथ बलमा गरेको छ । हामीले त्यो कुराहरुलाई नदोहोर्याउने कोशिश गर्ने छौँ ।'
थ्री स्टारका मुख्य प्रशिक्षक उर्जन श्रेष्ठले पुरानो गल्ति नदोहोर्याउने बताए ।
'पहिलो खेलमा जुन गल्तिहरु भएको थियो । सेट पिसमा मात्र गोल भएको थियो । तर, हामीले टाइम ५-६ दिन पायौं । तयारी राम्रो छ । मलाई लाग्छ खेलाडीले राम्रो गर्छ,' उनले भने, ' सातदोबाटो राम्रो टिम छ । हेरौं के हुन्छ ।'
पहिलो खेलमा थ्री स्टारले च्यासल युथ क्लबलाई ३-० ले हराएको थियो । थ्री स्टार लिगको शीर्ष स्थानमा रहेको छ ।
'पहिलो खेलमा खेल अनुसार त्यति सन्तुष्ट छैन । अट्याकीङमा रामो भईरहेको छैन । अरुमा सन्तुष्ट छु,' प्रशिक्षक उर्जनले थपे ।
