जोकोभिचले रचे इतिहास

काठमाडौं । सर्वियाका नोभाक जोकोभिच ऐतिहासिक रुपमा सातौ पटक एटिपीको वरीयतामा विश्व नम्बर १ टेनिस खेलाडी बन्दै वर्षको अन्त्य गर्ने निश्चित भएको छ ।

जोकोभिचले अमेरिकी लेजेन्ड पेटे सामप्रासको कीर्तिमानलाई समेत भंग गरेका छन् ।

अष्ट्रेलियन ओपन, फ्रेन्च ओपन र विम्वल्डनको उपाधि जितेको जोकोभिचले युएस ओपनको फाइनलमा पराजय भोगेका थिए ।

जोकोभिचले रोलेक्स पेरिस मास्टर्सको सेमिफाइनलमा पोलान्डका हुवर्ट हुर्काजलाई पराजित गरेपछि सामप्रसको कीर्तिमान भंग गरेका हुन् ।

सामप्रस सन् १९९३ देखि १९९८ सम्म ६ पटक विश्व नम्वर १ खेलाडी बन्दै वर्षको अन्त्य गरेका थिए ।

यता ३४ वर्षीय जोकोभिचले भने विगत ११ वर्षमा सात पटक विश्व नम्बर १ खेलाडीको रुपमा वर्षको अन्त्य गर्दैछन् ।

उनी सातौ पटक पेरिस मास्टर्सको फाइनलमा प्रवेश गरेका हुन् ।