मेस्सी र एमबाप्पेबीच नयाँ दोस्ती

काठमाडौं । लियोनल मेस्सी आएपछि केयलिन एमबाप्पेले पेरिस सेन्ट जर्मेन (पीएसजी) मा आफ्नो भविष्य देखेनन्, त्यसैले उनी फ्रान्सेली लिग वान टिम छाड्न चाहन्थे ।

उनलाई डर थियो, मेस्सी र उनका नजिकका साथी नेयमार मिलेर कतै उनको खेल जीवन त समाप्त पार्ने होइन ? यो त भयो, पुराना कुरा ।

अब नयाँ कुरा । अहिले तत्काल नेयमारले पीएसजीका लागि खेलिरहेका छैनन्, किनभने उनी घाइते छन् । यस्तोमा टिम पूर्णत: मेस्सी र एमबाप्पेको टिकेको छ ।

पेरिसबाट उडेर आएको समाचारलाई आधार मान्ने हो भने नेयमारको अनुपस्थितिमा अहिले मेस्सी र एमबाप्पेबीच दोस्ती बढेको छ, उनीहरू राम्रा साथी भएका छन् ।

कम्तीमा यसको उदाहरण त, मैदानमै देखियो । पीएसजीले आरबी लाइपजिगलाई पराजित गर्दा दुवैको मन मिलेको देखियो । त्यस खेलमा पीएसजी ३-२ ले विजयी रहेको थियो । त्यसमा मेस्सीले पेनाल्टीबाट निर्णायक गोल गरे । क्लबका लागि पहिलो गोल त एमबाप्पेले नै गरे । त्यसपछि मेस्सीले दुई गोल थपे ।

खेलको अन्त्यतिर पीएसजीलाई एक अर्को पेनाल्टीको अवसर पनि प्राप्त भएको थियो । त्यसलाई मेस्सीले प्रहार गरेनन, प्रहारको अवसर एमबाप्पेलाई दिए ।

यो कुरा अर्कै हो कि एमबाप्पे यसमा सफल भएनन्, तर यसको मूल्य चर्को रहेन् । पीएसजी विजयी रह्यो । तर यसले के देखाएको छ भने कम्तीमा मेस्सी एमबाप्पेको मन जित्न चाहन्छन् । टिममा नेयमार आएपछि के हुन्छ, त्यो भने हेर्न लायक छ ।

–मार्काको सहयोगमा ।