किङ सलाह, यसपल्ट अर्कै खेलाडी

काठमाडौं । मोहमद सलाह युरोपेली च्याम्पियन्स लिगमा लिभरपुलले एटलेटिको मड्रिडलाई हराउँदा खुबै छाए र यसक्रममा उनले लिभरपुलका लागि लगातार नौ खेलमा गोल पनि गरेका छन् ।

यो क्लबका लागि नयाँ कीर्तिमान पनि हो । हुन् पनि अहिले यी इजिप्टका खेलाडी खुबै लयमा छन् र लाग्छ, यस सिजन उनी अर्कै खेलाडी सावित भएका छन् ।

सन् २०१७ मा लिभरपुल आएयता सलाहको प्रदर्शन अधिकांस समय उत्कृष्ट नै रहेका छ । तर यस सिजन उनको प्रदर्शन अझ उच्च देखिएको हो।

स्टायमफोर्ड ब्रिजमा लिभरपुल र चेल्सीले १–१ को बराबरी खेलेयता सलाह लयमा देखिएका हुन् । त्यसैले पनि लिभरपुल व्यवस्थापक योर्गन क्लोप उनको खुबै प्रशंसा पनि गर्छन् ।

सलाहबारे क्लोप भन्छन्, ‘यसपल्ट उनी जत्तिको खेलाडी अरू कोही पनि देखिएको छैन् ।’

अहिले एक प्रकारको बहस के चलिरहेको छ भने सलाह लियोनल मेस्सी र क्रिस्टियानो रोनाल्डो भन्दा पनि राम्रा छन् ।

सलाहले जुन प्रकारले एकपछि अर्को उत्कृष्ट गोल गरिरहेका छन्, त्यसले उनलाई अझ विशेष बनाएको छ ।

सलाहको यो लगातार राम्रो प्रदर्शनले लिभरपुल स्वंय आफै पनि दबाब आएको छ, किनभने सलाहको माग पनि बढ्दो छ र उनका एजेन्टले खेलाडीको तबल बढाउन पनि लगातार माग गरिरहेका छन् ।

लिभरपुल र सलाहबीच अहिले दुई वर्षको अनुबन्ध बाँकी छ । अरू केही क्लब उनीमाथि नजर लगाइरहेका छन् नै पनि ।

–मिररको सहयोगमा ।