फिर्मिन्होको ह्याट्रिक, लिभरपुल शीर्ष स्थानमा

काठमाडौं । इंग्लिस प्रिमियर लिग फुटबलमा लिभरपुलले फराकिलो जित निकालेको छ ।

शनिबार भएको खेलमा लिभरपुलले वाट्फोर्डलाई ५-० गोल अन्तरले पराजित गरेको हो ।

लिभरपुलको जितमा रोबर्टो फिर्मिन्होले ह्याट्रिक गोल गरे । साडियो माने र मोहमद सलाहले एक एक गोल गरे ।

खेलको नवौं मिनेटमा मानेले गोल गर्दै लिभरपुललाई सुरुआती अग्रता दिलाएका थिए ।

यससँगै मानेले प्रिमियर लिगमा १०० गोल पूरा गरेका छन् ।

माने प्रिमियर लिगमा १०० गोल पूरा गर्ने तेस्रो अफ्रिकन खेलाडी समेत बनेका छन् । यस अघि डिडियर ड्रोग्बा र मोहमद सलाहले प्रिमियर लिगमा १०० गोल पूरा गरेका थिए ।

खेलको ३७ औं मिनेटमा फिर्मिन्होले गोल गर्दै लिभरपुललाई २-० को अग्रता दिलाए ।

खेलको ५२ औं मिनेटमा फिर्मिन्होले व्यक्तिगत दोस्रो गोल गर्दा लिभरपुल ३-० ले अघि रह्यो ।

खेलको ५४ औं मिनेटमा सलाहले गोल गर्दा लिभरपुल ४-० ले अघि रह्यो ।

त्यसपछि खेलको इन्जुरी समयमा फिर्मिन्होले ह्याट्रिक पूरा गर्दै लिभरपुललाई ५-० को जित दिलाए ।  

यस जितसँगै लिभरपुल अंक तालिकाको शीर्ष स्थानमा उक्लिएको छ ।

लिभरपुलले ८ खेलमा १८ अंक जोडेको छ ।

वाट्फोर्ड ७ अंक जोडेर १५ औं स्थानमा रहेको छ ।