पारस र दीपेन्द्रले ईपीएल नखेल्ने

काठमाडौं । राष्ट्रिय क्रिकेट टिमका पूर्व कप्तान पारस खड्काले चौंथो संस्करणको एभरेष्ट प्रिमियर लिग (ईपीएल) टी-ट्वान्टी क्रिकेट प्रतियोगिता नखेल्ने भएका छन् ।

ईपीएलले मंगलबार सार्वजनिक गरेको ईपीएल खेल्ने खेलाडी सूचीमा पारस परेका छैनन् । पारस विराटनगर वारिवर्समा आबद्द थिए ।

पारस विराटनगरका कप्तान समेत रहेका थिए । उनको कप्तानीमा विराटनगरले दोस्रो संस्करणको उपाधि जितेको थियो ।

पारसले दुई महिना अघि अन्तराष्ट्रिय क्रिकेटबाट सन्यास लिएका थिए । तर, घरेलु क्रिकेट भने खेल्ने बताएका थिए ।

यस्तै नेपाली टिमका उपकप्तान दीपेन्द्र सिंह ऐरीले समेत ईपीएल नखेल्ने भएका छन् । दीपेन्द्रले चोटको कारण नखेल्ने भएका हुन् । दीपेन्द्र काठमाडौं किङ्स-११ मा आबद्द थिए ।

त्यस्तै बलर बसन्त रेग्मीले समेत ईपीएल खेल्ने छैनन् । विराटनगरमै आबद्द रहेका उनी टिममा रहेका छैनन् ।

चौंथो संस्करणको ईपीएल शनिबारबाट सुरु हुँदैछ ।

कीर्तिपुरस्थित टियु क्रिकेट मैदानमा आयोजना हुने ईपीएलमा ६ शहरका फ्रेन्चाइज टिमले प्रतिस्पर्धा गर्ने छन् ।

प्रतियोगिताको विजेताले ५० लाख प्राप्त गर्नेछ । यस्तै उपविजेताले १५ लाख पाउने आयोजकले जनाएको छ ।