क्षमता देखाउने अवसर : फिलिप्स

काठमाडौं । राष्ट्रिय महिला फुटबल टिमका मुख्य प्रशिक्षक ग्यारी फिलिप्सले एसियन कपको छनोट नेपालका लागि क्षमता देखाउने अवसरको रुपमा रहेको बताएका छन् ।

छनोट प्रतियोगिता सुरु हुनु अघि बिहिबार पत्रकार सम्मेलनमा बोल्दै फिलिप्सले छनोट खेल महिला फुटबलको प्रवर्द्धनका लागि मात्र नभएर आफ्नो खेल र क्षमता देखाउने अवसरको रुपमा रहेको बताए ।

'नेपाली महिला फुटबल टिमको लागि यो एउटा अवसर मात्र हैन । महिला फुटबल प्रवद्र्धनका लागि मात्र हैन आफ्नो खेल र क्षमता देखाउने अवसर पनि हो ।' उनले भने ।

उनले नयाँ खेलाडीको आगमनले टिममा नयाँ उर्जा थपेको बताए ।

फिलिप्सले भने, 'नयाँ र युवा खेलाडीको सहभागीताले टिममा नयाँ उर्जा थपेको छ । हामी राम्रो खेल प्रर्दशन गर्नेमा विश्वस्त छौं ।'

नेपाल छनोट प्रतियोगिता खेल्न उज्वेकिस्तानको ताश्केन्त पुगेको छ ।

नेपाल समूह एफमा रहेको छ । नेपाल रहेको समूहमा फिलिपिन्स र हङकङ रहेका छन् ।

नेपाली टिम गत मंगलबार उज्वेकिस्तान पुगेको थियो । नेपाली टिमले प्रतियोगिताका लागि तयारीका लागि उज्वेकिस्तानमा सामान्य प्रशिक्षण समेत गरेको छ ।

प्रतियोगिताका लागि नेपालले नेपालमा बंगलादेशसंग दुई मैत्रीपूर्ण फुटबल खेलेको थियो । दुवै खेलमा नेपालको प्रर्दशन र नतिजा राम्रो रहेन । नयाँ प्रशिक्षकको खेल्ने शैलीमा खेलाडीले सिक्न गाह्रो मानेका थिए ।

नेपालले असोज २ मा फिलिपिन्ससंग खेल्दै छनोट प्रतियोगिताको सुरुवात गर्नेछ । नेपालले असोज ५ मा हङकङसंग खेल्नेछ ।

समूहको शीर्ष स्थानमा रहने टिमले अर्को वर्ष भारतमा हुने एसियन कप खेल्नेछ ।