काठमाडौं । फुटबल विवाद छानविनका लागि राष्ट्रिय खेलकुद परिषद् (राखेप)द्धारा गठिन समितिले अनुसन्धान प्रतिवेदन बुझाउने तयारी गरेको छ ।
सहमतीको प्रयास असफल भएपछि समितिले छानविन प्रतिवेदन राखेप सदस्य सचिव रमेशकुमार सिलवाललाई बुझाउने तयारी गरेको हो ।
समितिले विवादका मुख्य पात्र एन्फाका वरिष्ठ उपाध्यक्ष पंकज बिक्रम नेम्वाङ र मुख्य प्रशिक्षक अब्दुल्लाह अलमुताइरीबीच सहमती जुटाउने गृहकार्य समेत गरेको थियो । तर दुवै पक्ष आफ्नो अडानबाट 'टसमस' नभएपछि समितिले अनुसन्धान प्रतिवेदन आज (बुधबार) बुझाउन लागेको हो ।
दुवै पक्षले आफुसंग माफी माग्नुपर्ने अडान राखेपछि सहमती जुट्न नसकेको बताईएको छ ।
समिति प्रवक्ता एवंम बोर्ड सदस्य सुवर्ण श्रेष्ठले छानविन प्रतिवेदन राखेपमा बुझाइने बताईन् ।
‘सदस्य सचिवको समय प्राप्त भएको छैन । तर साँझसम्म प्रतिवेदन राखेपमा बुझाउने तयारी गरेका छौं ।’ उनले खेलपाटीसंग भनिन् ।
उनले प्रतिवेदन कार्यान्वयनका लागि सहज होस् भनेर बुँदागत रुपमा सुझाव निष्कर्श निकालिएको बताइन् ।
‘प्रतिवेदन कार्यान्वयनमा सहज होस भनेर सुझाव र निष्कर्श लेखेका छौं ।’ उनले थपिन् ।
मुख्य प्रशिक्षक अलमुताइरीले वरिष्ठ उपाध्यक्षलाई कारण देखाउँदै पदबाट राजीनामा दिने घोषणा गरेपछि फुटबलमा विवाद चर्किएको थियो । प्रशिक्षकले वरिष्ठ उपाध्यक्षका कारण आफुले तनाव झेलिरहेको उल्लेख गर्दै पदबाट राजीनामा दिने घोषणा गरेका थिए । तर एन्फा अध्यक्ष कर्माछिरिङ शेर्पा सहितका पदाधिकारीले सम्झाएपछि उनी राजीनामा दिने प्रक्रियाबाट पछि हटेका थिए ।
वरिष्ठ उपाध्यक्ष नेम्वाङ्गले भने राजनीतिक प्रतिशोधका आधारमा आफुमाथि आरोप लगाईएको उल्लेख गर्दै छानविनका लागि एन्फामा निवेदन दिएका थिए । प्रशिक्षक अलमुताइरीले समेत घटनाको अनुसन्धानका लागि निवेदन दिएका थिए ।
एन्फाको आकस्मिक कार्यसमिति बैठकले घटनाको छानविनका लागि युवा तथा खेलकुद मन्त्रालयललाई आग्रह गर्ने निर्णय गरेको थियो । मन्त्रालयले घटनाको छानविन गरि सुझाव सहितको प्रतिवेदन पेश गर्न राखेपलाई निर्देशन दिएको थियो ।
राखेपले फुटबल विवाद छानविनका लागि बोर्ड सदस्य पुरेन्द्रबिक्रम लाखे नेतृत्वमा ७ सदस्यीय समिति गठन गरेको थियो । समितिले घटनामा प्रत्यक्ष तथा अप्रत्यक्ष रुपमा जोडिएका व्यक्तिसंग बयान लिएर आवश्यक कागजातको अध्ययन गरि प्रतिवेदन तयार पारेको छ ।
-1731292263.jpg)
-1732590134.webp)
